Aquesta dimenjada balhèt pas lo sorire als catalans e als occitans en Superliga o en Championship. La dimenjada qu’arriba, espectacle en vista a Carcassona amb las 5 partidas de la Dimenjada Magica d’Elèit 1.

Los Dragons pegats a la darrièra plaça
 
Novèl desplaçament catastrofic pels Dracs en Anglatèrra: Williams, lo centre, que pòt pas jogar al darrièr moment; l’arrièr David Mead que se nafra; en fàcia, aquel diable de Luke Gale a l’origina amb sos còps de pè de cinc dels sèt ensages marcats pels Tigres de Castleford, que ganhan 41-0.
 
Divendres, a uèit minutas de la fin, Leeds menava 8-0 sus sa pelena. A la còrna, amb un tombat dels 40 mètres en diagonala de Sam Tomkins, la victòria èra per Wigan: 9-8!
 
Dimenge, lo cap de fila Saint Helens pèrd a Wakefield: 24-20.
 
Aqueste dimenge 22, los catalans aniràn jogar a York pel compte de la Cup.
 
 
Baissa de regim dels tolosans
 
En Championship, Tolosa marca lo pas e pèrd a Batley: 46-22. Ara, una dimenjada de pausa, que lo club s’es pas marcat per jogar la Cup.
 
 
Cap a la Dimenjada Magica
 
En Elèit 1, èra la dimenjada de mesa a jorn del calendièr. Vilanòva encadena una segonda victòria en seguida e bat Albi: 26-22. Limós ganha aisidament a Tolosa 60-12 e torna a nautor dels Dragonets al cap del classament.
 
Aquesta dimenjada, las dètz formacions se traparàn a Carcassona per la Dimenjada Magica. L’òrdre dels rescontres es determinat pel classament a la fin de las partidas anar.
 
Tres partidas lo dissabte: a 14h (9n-10n): Palau-Tolosa; 16h (7n-8n): St Gaudenç-Vilanòva; a 18h (1r-2d): Limós-Lesinhan; un sopar bèl lo dissabte de ser; dos rescontres dimenge: a 14h (5n-6n): Albi-Carcassona; 16h (3n-4n): St Estève XIII Catalan contra Avinhon.
 
 
Copas
 
Lo tiratge de las mièjas finalas de la Copa Lòrd-Derby se faguèt dimècres de matin en dirècte dempuèi França-3-Sud a Tolosa. Las 2 partidas se debanaràn lo dissabte 5 de mai a Carcassona: Limós-Albi (15 h) e Dragonets-Lesinhan (18h).
 
Lo dimenge 6 de mai, a Limós, se tendràn las mièjas finalas de la Copa Nitard dels juniors: Carcassona-Tolosa e Lesinhan-Baó.
 
En Challenge Aillères, la copa reservada a l’Elèit 2, la finala (lo 28 o lo 29 d’abril a Ramonvila) serà un afrontament entre Vilafranca de Roergue qu’a escartat Ferrals (44-4) e lo Vilagalhenc-Argon Rugby League qu’es anat ganhar a Carpentràs: 46-6.
 
 
En NRL, lo truc divendres
 
En Austràlia, los Dragons de Sant Jòrdi Illawarra son ara sols al cap del classament aprèp una larga victòria 40-20 sus las Làmias. Los Combatents neozelandeses an conegut lor primièra desfaita de la sason sus lor pelena fàcia als Bròncos: 27-18, mas aqueste divendres reçaupràn los Dragons.
 
 
 
 
Alan Roch