De l’estadi dau Rai au novèl estadi, se pauèt la question dau nom. La comuna de Niça faguèt lo rampèl ai esponsòrts per ajudar a finir de pagar la construccion pesuga de l’estadi.

Malgrat de proposicions coma “Garibaldi Arena”, lo Grop d’asseguranças tedesc Allianz fondat en Baviera siguèt causit a condicion que l’estadi se sòne “Allianz Riviera“. D’uni protestacions venguèron dau fach qu’entre autre, entre li doi guerras Kurt Schmitt Director general d’Allianz e simpatisant nazi, fuguèt ministre dau Reich tedesc de 1933 a 1935.
 
En seguida d’una campanha de publicitat -veire l’aficha en illustracion- 2386 participants an fach 8663 proposicions.
 
Lu detz noms mai proposats  -45% de la totalitat– siguèron retenguts: Adams (un jugaire), Bjekovic (jugaire), Garibaldi (Josep Garibaldi, eròi niçard), Gonzalez (jugaire), Masséna (militari niçard au servici de França, República pi Empèri), Médecin (cònsols de Niça), Nurenberg (jugaire), Ray (Rai, nom de l’ancian estadi), Segurane (Catarina Segurana, eroïna niçarda), Sud (coma Sud de França ò la Brigada Sud de suportaires ultras).
 
Podiam dificilament esperar la seleccion de termes coma “Occitània”, “País d’Òc”, “Contea” (ò ancara mens Gavotina, Aups, Provença, Mediterrànea), mas caurà esperar que seran retenguts lu 4 noms mai emblematics dins la tiera per la region: Garibaldi (que degun establiment ò institucion pòrta aquèu nom), Rai, Segurana e Sud.
 
De notar qu’aquesto bastiment dèu integrar, en mai de comercis e de restaurants, lo Musèu nacional de l’espòrt.
 
 
 
 
Laurenç Revèst