Actualitats
Estrasborg: un eurodeputat critica Macron sens sal ni pebre
“De considerar d’èssers umans coma «res» es permetre de lor far patir qué que siá, e aquò o acceptarem pas jamai”
Dimars passat, lo president francés, Emmanuel Macron, vesitèt pel primièr còp lo Parlament Europèu a Estrasborg (Alsàcia). I anèt per i liurar sa vision de l'avenir e d'Euròpa e foguèt aplaudit mas tanben deguèt escotar de criticas. De soslinhar la que venguèt de l’eurodeputat ecologista bèlga Philippe Lamberts.
Sus un ton virulent, Lamberts critiquèt “l’accion en França” de Macron que “malmena la devisa «Libertat, egalitat, fraternitat»” amb la venda d’armas, lo nuclear, l’expulsion de Kernitron al Lann, los camps de migrants, las assignacions a residéncia. Lambert demostrèt ponch per ponch las contradiccions entre çò que lo president francés ditz e çò que fa. “De considerar d’èssers umans coma «res» es permetre de lor far patir que que siá, e aquò o acceptarem pas jamai”, çò apondèt lo deputat bèlga.
Ansin, Lamberts tornèt prene l’expression de Macron “los primièrs de la cordada” facha en 2017 per definir los que reüssisson, e li ofriguèt coma present una còrda d’escalada. “Avètz pres costuma d’ofrir als vòstres òstes un present simbolic, permetètz-me de far la meteissa causa”, çò diguèt Lambert en precisant que “dins nòstras societats aquela còrda existís pas pus: los rics s’enriquisson, las classas mejanas estagnan e se precarizan del temps que los pus fragils son abandonats a lor sòrt”, çò precisèt.
La violenta responsa de Macron
La responsa de Macron montèt lo ton mai encara. “Podètz tenir de prepauses d’estrada car avètz lo confòrt d’aqueste salon. En nom del respècte qu’ai per aqueste Parlament, vos pòdi pas daissar dire de bestiesas e contraveritats”, çò respondèt lo president francés.
Vaicí lo vidèo de l'intervencion de Lamberts e la responsa de Macron:
Solidaritat internacionalista entre Galícia e Corsega
Tanben conven de remarcar que, durant la meteissa sesilha, una eurodeputada galèga, Ana Miranda, despleguèt una bandièra còrsa davant Macron per tal de protestar contra la politica del president francés envèrs Corsega. D’efièch, Emmanuel Macron refusa d’escotar la demanda del govèrn còrs, que vòl l’oficialitat de la lenga insulara e l’autonomia per son illa.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo messorguier de Macron haguet la barra de dire que bombardejaren Siria per anar contra los terroristas de l'Estat Islamic. Tot lo contrari, es lo mentider mai gran de l'historia .
Los medias franceses an pesugament quichat sus la responsa de Macronas sens citar l'intervention dau senher Lamberts. Una messorga per omission, que fai passar la responsa per un discors musclat, per la gloria mai granda dau sembla-napoleon de l'Eliseu. Om compren lo perque d'aquel doblit intencional made in Fronce. Mossen Lamberts a lo tort d'explicar lindament aquo que la jornalistalha parisenca s'interditz de faire per paur de sacrilègi : nos revelar ço qu'es l'engana macroniana. Osca, senher Lamberts !
La respòsta de nòstre actuau president manifesta un còp de mai son arrogància de banquier enarca. E respond pas a las criticas que li son fachas.
A ! s'aviam a França , deputats coma aqueste sénher Lamberts. Per malastre, avem los palhassas de "la France en marche" e autres partits. Mas sabem ja coma disiá lo General que " Les français sont des veaux".
Vaquí un òme qu'exprima fòrça clarament, çò que ressenten de mai en mai de monde en França e endecòm mai !
òsca aquela Belgica que refusa d'extradir los patriotas catalans a l'exili e qu'a deputats tan clarvesent coma lo sénher Lamberts !
Mercés, sénher deputat !
Ai mancat los articles del Jornalet ont lo mèsme deputat tensava los dirigents poloneses (que son pas jamai presents dins la lor assambleda) e ongreses!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari