La construccion d’un tunèl a Tenda (Val de Ròia) poiriá portar una catastròfa ecologica a la Val de Ròia, que polluiriá l’aiga que se consuma dins l’encontrada e tanben a Menton, Ventemilha e una partida de Mónegue.

 

Lo cònsol de Tenda (Val de Ròia), Jean-Pierre Vassalo, ven d’avertir lo prefècte del departament de la perilhositat del curum del talhièr del tunèl illegalament entrepausat aquí, çò rapòrta Nice-Matin. D'efièch, son entrepausadas de desenas de tonas de gip e d’anidrit, çò es de curum classat que l’entrepresa italiana Fincosit, implicada dins l’enòrme escàndol de vòls de material sul talhièr, a daissat entrepausat a l’aire liure.

 

Quand plòu, aqueles material se desfàn e pòdon polluir Ròia, lo flume que travèrsa la val e que fornís l’aiga als ostals de Menton, de Ventemilha e d'una partida importanta de Mónegue. De fach, s'es ja trobat aqueles contaminants dins un afluent.

 

Lo geològ niçard Jean-Alain Vernet confirma a Nice-Matinlo perilh potencial d’un escorrement d’aqueles anidrits: “Compte tengut que siam en tèsta d’un bacin versant, riscatz de modificar la composicion quimica de l’aiga. Aquesta pòt aver de consequéncias perilhoas sus tota la cadena alimentària e un impacte ecologic tot plen perilhós”.

 

N’avertisson dempuèi longtemps las associacions environamentalistas de Ròia. Lo cònsol màger Vassallo se mòstra escandalizat: “Es un escàndol economic, ecologic, environamentau e bensai alieutic”.

 

De costat, la prefectura reconeis l’existéncia illegala d’aquelas tonas de curum entrepausat, mas assegurar que i a pas cap de perilh. Dimècres passat, i mandèt d’expèrts qu’aurián analisat los materials en afirmant que presentan pas cap de perilhositat.