Es sortit, e descargable en linha, lo darrièr album d’Alidé Sans amb Paulin Courtial entitolat Henerècla. La cantadoira aranesa, acompanhada del guitarrista roergàs, presentèt lo trabalh coma “ua alenada d’aire fresc que baishe des montanhes” e expliquèt que dins lo trabalh “i a ua fòrta preséncia dera natura qu’ac pintre tot damb es sues colors”.
 
Aigua, natura, riu, femna... serián los mots clau per definir aqueste darrièr trabalh ont trobam de cançons engatjadas per l’environament, per la natura. Mas lo feminisme e la situacion politica que la vivon Catalonha e Aran son fòrça presents tanben dins las paraulas de sas cançons.
 
Ont trobar Henerècla?
 
Lo disc se pòt trobar sus mai d’una plataforma d'Internet coma Spotify, Deezer, Google Play, Amazon Music, iTunes o YouTube.
 
Totun, s'agís d'un projècte autogerit e autofinançat amb lo labèl Hèt a man. Podètz mandar vòstras comandas per aver lo disc fisicament en escrivent a www.alidesans.com/contacte.
 
Lo disc serà tanben crompable dins los concèrts de presentacion. Henerèclase presentèt lo 30 de mai passat en Aran, dins l’encastre el festenal Pyrenades, e puèi, amb grand succès, se presentèt lo 6 d’abril a l’Harlem Jazz Club de Barcelona dins l’encastre del festenal Barnasants, e divendres passat a Rodés. 
 
Ara faràn una tièra de presentacions per Occitània, los Païses Catalans e quitament lo Bascoat.
 

fffff		fffff
	Las presentacions avenidoiras son:   Occitània   — 4 mai: Nontron (Peiregòrd / Nontronés)   — 24 maig: Hestenau Sauta Moton - Sant Laurenç de Nestés (Comenge / Nebosan)   — 31 junh: Festenal Balad’òc - Tula (Lemosin / País de Tula)   — 23 junh: Canilhac (Gavaudan / Causse de Sauvatèrra)   — 13 julhet: Arle (Provença / Camarga)   — 28 julhet: Vasats (Lanas e Labrit / Vasadés)   — 5 agost: Narbona (Bas Lengadòc / Narbonés)   — 12 agost: Blela (Auvèrnhe / Brivadés)   — 28 setembre: Sant Gaudenç (Comenge / Nebosan)   Païses Catalans   — 22 abril: Castelló de Farfanya (Catalonha)   — 26 abril: Universitat de València (País Valencian)   — 27 abril: Reus (Catalonha)   — 5 mai: Vilanova i la Geltrú (Catalonha)   — 19 mai: Xàtiva (País Valencian)   — 10 junh: Lhèida (Catalonha)   — 8 setembre: Vilanova i la Geltrú (Catalonha)   Bascoat   — 16 julhet: Gasteiz

D’aquel novèl trabalh d’Alidé Sans e Paulin Cortial soslinham era cançon “Eth Riu” que son videoclip podètz veire aicí: