Almens 52 personas mòrtas, e un centenat de nafradas, es lo tragic bilanç d'un atemptat qu’estrementiguèt Kabol dimenge passat. Un kamikaze que portava una bomba s'immolèt entre un grop de personas que fasián la coa per accedir a un centre del registre electoral. L’autoproclamat Estat Islamic revendiquèt l'atemptat amb un comunicat publicat per l'agéncia Amaq.
 
Lo sit atacat es dins l'oèst de Kabol, un quartièr residencial ont i a fòrça membres de la comunautat shiita.
 
E mai las eleccions sián previstas en octòbre venent, las autoritats afganas an decidit d'avançar lo registre dels votants per elaborar la lista electorala, a causa de la malaisida situacion que la patís Afganistan.
 
Lo numèro dos del govèrn afgan, Abdullah Abdullah, condemnèt l’ataca. "Nòstra determinacion de far d’eleccions justas e transparentas persistirà e los terroristas ganharàn pas contra la volontat del pòble afgan", çò diguèt.