Lo realizaire Terry Gilliam es un dels Monty Python. Aqueste es lo mèstre dels decòrs e de la fantasiá distopica de filmes coma 12 monins (traducha en francés coma L’Armée des douze singes). L’adaptacion al cinèma de Dòn Quishòt a la reputacion d’èsser un filme maldich, puèi que foguèt la fixacion de las darrièras 20 annadas d’Orson Welles qu’arribèt pas de l’acabar, e contunhèt d’èsser maldich pendent sa quincanèla dins un rodatge de la version de Gilliam pendent l’an 2000 en Espanha, rebatut dins lo documentari Lost In La Mancha (Perduts en La Mancha). En fin, s’es anonciat ongan la sortida del filme lo 19 de mai que ven, coma filme de clavadura del Festenal de Cinèma de Canas 2018, al tresen ensag e amb una distribucion completament novèla.
 
Qualqu’un auriá degut explicat a Gilliam que lo desèrt ont voliá tornar, Las Bardenas Reales, dins lo sud de Navarra, èra una zòna d’assages dels avions de caça F16 de l’armada espanhòla. Qualqu’un auriá degut dire qu’a son actor principal, Jean Rochefort, li avián pas fach una assegurança quand tombèt malaut d’una ernia discala per èsser montat a caval a 70 ans. Los malaises se succedissián del temps que lo realizaire pensava a son experiéncia amb Las aventuras del Baron Munchausen. Lo filme costèt lo doble del budget previst e vegèt pas jamai lo circuit del vidèo domestic a causa del caos que lo comportèt la quincanèla e la desaparicion del distributor de cinèma Columbia Pictures a las mans de Sony: la distribucion del filme foguèron 117 còpias tot comptat e rebatut, mentre que los filmes d’art an de tiratges d’aperaquí 400 còpias.
 
Mancava sonque un auratge d’estiu per qu’un aigat de fanga trenquèsse una granda part del material tecnic. Lo filme de Dòn Quichòttombèt sens remèdi. Amb los problèmas financièrs se podián pas permetre de retardar mai lo filme, e demorèron sens finançament, sens actors, sens sosten.
 
The Man Who Killed Don Quixote (L’Òme que tuèt Dòn Quishòt) es l’istòria que coneissèm “amb una virada de fantasiá dins la fantasiá”, çò disiá Gilliam, ont Gilliam concep lo personatge de Toby Grisoni, un publicista que viatja fins al sègle XVIn. Toby se fa passar per Sancho Panza, e demòra dins sa pèl l’istòria del libre que totes a son epòca coneisson.
 
Dins la novèla version, Adam Driver, conegut coma lo Kylo Ren d’Star Wars —o Paterson se vos agrada mai lo cinèma d’autor— pren lo ròtle de Sancho, per ont i aviá prèviament dins las produccions falhidas Johnny Depp o Ewan MacGregor. Dins lo ròtle de Dòn Quishòt, Gilliam recupèra Jonathan Pryce, lo protagonista de Brazil, un dels filmes màgers del realizaire.
 
Sa filmografia accidentada a pas fach que far créisser lo mite de Terry Gilliam. The Man Who Killed Don Quixote promet, e fòrça, d’èsser una autra de sas fòlas fantasiás, qu’amb lo productor adeqüat, de mai de mai, serà un autre de sos filmes amusantissims que, se res nos o empedís pas, poirem agachar aqueste estiu.
 
 

Zep Armentano
 
 
 
 

 
 
    

fffff		fffff
	Ongan, Jornalet serà present al Festenal de Canas, d’ont vos raportarem, sus plaça, lo festenal de cinèma pus important d’Occitània e d’Euròpa.