Era tòca dera amassada que siguec eth de hèr a conéisher ar encastre universitari barcelonés aqueth mon romanic de termièra que represente era lengua, era cultura, era gent e eth territòri d’Aran.

Deluns passat, 29 d’octobre, ua variada representacion d’estudiosi d’aquera realitat pirenenca qu’aufriren ath public assistent diuèrsi guardars sus era Val d’Aran e sus er occitan aranés.
 
Aitor Carrèra, director dera cagira d’estudis occitans dera Universitat de Lhèida, qu’analizèc er occitan dera Val d’Aran segontes es parlars actuaus, es estudis hèti , com ei era lengua enes cançons e enes arrepervèris... e qu’expliquèc qu’eth parlar de Quate Lòcs seguís per Bauartés, atau coma eth parlar de Pujòlo seguís per Coserans. Era intervencion de Carrèra que servic de ligam ara presentacion de Claudi Aventin e de Ricard Novell, guides professionaus e expèrts ena cartografia dera Val d’Aran.
 
Deth sieu costat, eth bascològ Josep del Río sosquèc sus es ressons basqui ena toponimia aranesa e er estudiant Roger Ferran Baños acarèc er aranés damb ua auta varietat perfierica der occitan: eth gardiòl.
 
Eth poèta aranés Xavi Gutiérrez presentèc era creacion poetica ena Val, seguit per Jep de Montoya, cap de cultura deth Conselh Generau d’Aran, que presentèc eth Vademecum Aranense, un percors de tèxtes escriti en aqueth cornèr occitan ath long dera istòria.
 
Era Lei der occitan, aranés en Aran siguec analizada per Xavier Moral, dera Direccion Generau de Politica Lingüistica dera Generalitat de Catalonha. Cau díder qu’era directora der organisme, Yvonne Griley, siguec presenta ena jornada dempús d’auer-la inaugurada.
 
Fin finau, vengueren dues charrades sus eth bon usatge e sus era vida sociau der occitan aranés a cargue de Jordi Suïls, dera Universitat de Lhèida, e de Xavier Lamuela, dera Universitat de Girona; s’agís de dus grani coneisheires der aranés.
 
En tot acabar er acte, eth doctor José Enrique Gargallo, organizador dera amassada, que mostrèc era sua emocion en declarar que s’agie d’un “sòn hèt realitat”.