L’autor de l’atac a la veitura-bosson de Toronto, que diluns passat tuèt dètz personas e ne feriguèt d’autras catòrze, a comparegut davant lo jutge. Per ara, las autoritats escartan que foguèsse un acte terrorista, mas lo tuaire, Alek Minassian, a pas d’antecedents judiciaris ni mai es restacat a cap de movement politic o religiós. Segon sos companhs d’estudis, es una persona amb de dificultats de socializacion e qualque problèma de santat mentala, mas pas brica violent.
 
Cossí que siá, aqueste còp se poirà enquestar sus çò qu’a menat l’assassin a cometre aquel masèl, car la polícia canadenca reüssiguèt a lo reduire sens tirar un sol còp de fuòc.
 
 
Un enigmatic messatge misogin
 
Pauc abans de cometre son crime, Minassian publiquèt un messatge sus Facebook que disiá: “La rebellion incel a començat! Vencerem totes los Chads e Stacys! Saludatz totes lo suprèm cavalièr Elliot Rodger!”. Puèi, Facebook escafèt aquela publicacion.
 
La referéncia a Elliot Rodger es una allusion a un gojat estatsunidenc de 22 ans qu’en 2014 tuèt sièis personas e se suicidèt, en Califòrnia. Abans de cometre son crime, Rodger acusèt las femnas de l’aver transformat en un “incel”, un mot qu’el emplegava per nomenar “lo celibat involontari”, puèi qu’èra estat rebutat per plusors femnas. Los mots “Chads” e “Stacys”, tanben los empleguèt rodger, en apelant “Chads” los òmes qu’an de succès amb las femnas, e “Stacys” las femnas qu’an de relacions amb los “chads”.
 
Los autonomenats “incels” creson que lo Mond es injust amb los òmes eterosexuals pauc atractius, e cèrcan de sosten anonim dins los forums d’Internet o suls rets socials. S’agís d’òmes que sovent denigran las femnas e lo feminisme, e tanben las personas qu’an una vida sexuala activa. Los mai extremistas defendon lo violament e d’autras formas de violéncia contra las femnas.
 
La polícia canadenca a confirmat que la majoritat de las victimas de l’atac de diluns passat a Toronto èran de femnas d’entre 20 e 80 ans.