Lo primièr de mai passat, nasquèt un nòu movement politic occitan independentista e d’esquèrra. S’agís de l’Organizacion Democratica del Pòble Occitan (ÒDPO), un movement que revendica l’independéncia d’Occitània e lo socialisme, la reünificacion del país e sa reoccitanizacion. Dins son primièr comunicat, publicat sus son sit web e dins lo jornal Nòs, l’ÒDPO revendica un estat independent per Occitània amb un sistèma socialista, mentre que se bat per la reünificacion dels occitans dels estats francés, espanhòl e italian. Per ansin, convidan los compatriòtas de la Val d’Aran e de las Valadas a jónher l’organizacion.
 
Quant a “l’unitat d’Occitània dins sa pluralitat”, l’ÒDPO critica los secessionismes lingüistics que tornan sorgir “en causa de la crisi actuala de l’occitanisme”. Dins aquel sens, revendican l’unitat de la lenga occitana dins sa diversitat dialectala, del temps que defendon un movement unit qu’emergisca de la basa e siá pas concentrat. 
 
 
Reoccitanizacion
 
Dins son primièr comunicat, l’ÒDPO explica l’istòria d’Occitània dempuèi lo començament de sa conquèsta fa 800 ans, e situa sa lucha “ contra la politica de desrasigament, de dominacion e d’assimilacion que los estats conquestaires an planificada”. S’alçan doncas “contra l’etnocidi de la comunautat occitanofòna” e tanben “contra la desaparicion sistematica de l’occitan”. Per tant, militan “per la reoccitanizacion de l’Occitània entièra per que nòstre pòble siá tornarmai liure e conscient”.
 
 
Reviscolar la lenga
 
En respècte de la recuperacion de l’occitan, l’ÒDPO prepausa de politicas de mobilizacion de las massas a l’entorn de la lenga e de la cultura. Aquò concernís l’obligatorietat de l’occitan a l’escòla, l’encoratjament a la creacion en occitan e la “renacionalizacion dels patronims, dels noms de vilas e de luòcs”.
 
Tanben prepausan l’oficializacion de las lengas dels pòbles sens estat coma las lengas dels ròms, l’amazigh e quitament lo peitavin-santongés. E mai, preveson de politicas culturalas en favor de las minoritats nacionalas del país coma la josieva, la portuguesa o las sortidas de las èx-colònias francesas.
 
 
Republica populara, ecologista e feminista
 
Quant al programa politic, l’ÒDPO prepausa un republica federala e socialista jos la forma d’una democracia populara dins un sistèma d’assembladas. Prepausan la collectivizacion de las grandas proprietats e lo desmantelament dels grands monopòlis coma Dassault, Carrefour, Renault, Danone, Total o Areva.
 
Tanben prepausan una reorientacion de l’agricultura devèrs una produccion de proximitat e sana, e d’una produccion ecologica “en armonia amb la biosfèra”. Quant a l’animalisme, creson que cal “reconsiderar lor plaça” e l’aument dels dreches dels animals, e mai vòlon una “regulacion e reduccion de la produccion de carn, lo desvolopament de l’elevatge extensiu e la reduccion de l’elevatge intensiu. A prepaus de la lucha per l’environament, son per l’enebicion de la fracturacion idraulica.
 
Enfin, la republica occitana que la prepausa la nòva organizacion es, de segur, feminista. Dins aquel sens, prepausan lo comjat remunerat per maternitat o paternitat, la lucha contra las violéncias masclistas e una mobilizacion per l’educacion antisexista dels òmes e de las femnas. Tanben militan pel respècte e per l’afirmacion dels dreches LGTBI, e luchan contra l’omofobia e la transfobia.