Lo caumatge dins la Zòna Èuro pogèt en setembre passat fins al nivèl recòrd d’11,6%, çò es 1% de mai qu’en agost e 1,3% de mai qu’arunan, segon de donadas d’Eurostat. Aquelas donadas soslinhan qu’Espanha es l’estat amb las mai marridas chifras de caumatge de l’Union Europèa (UE); ont la taxa de caumatge pogèt a 25,8%, 0,3% de mai qu’en agost.
Dins tota l’UE, la taxa de caumatge se placèt en setembre a 10,6%, qu’es la meteissa chifra qu’en agost, mas mai nauta que los 9,8% enregistrats en setembre de 2011.
L’agéncia estatistica europèa calcula que 25 751 000 personas son privadas d’emplec en setembre dins l’UE, dont 18 490 000 son dins la Zòna Èuro. Çò es una aumentacion mesadièra de 169 000 caumaires dins tota l’UE e de 146 000 dins la Zòna Èuro.
Quant a agost de 2012, lo nombre de caumaires pogèt a 2 145 000 de personas dins l’UE dont 2174 milions dins la Zòna Èuro.
Demest los estats qu’an publicadas lors donadas, las taxas mai bassas de caumatge s’enregistran en Àustria (4,4%), en Luxemborg (5,2%), als Païses Basses e en Alemanha (5,4%), del temps que las mai nautas son las d’Espanha (25,8%) e Grècia (25,1% en julhet de 2012).
D’un autre costat, la taxa del caumatge masculin a pojat a 0,2% dins la Zòna Èuro, en arribant a 11,5% (10,6% dins l’UE) en comparason amb agost. Per rapòrt a aquò, lo caumatge femenin, dins los païses de l’èuro, a pojat 0,2%
Per çò qu’es dels mai joves de 25 ans, lo caumatge a aumentat de 0,3% dins la Zòna Èuro (23,3%) mentre que dins tota l’UE es arribat a 22,7%; 0,1% de mai que lo mes precedent.
De son costat, l’Estat espanhòl enregistrèt un caumatge de 54,2% entre los joves, 0,4% de mai qu’en agost; sonque après los 55,6% enregistrats en Grècia, e mai se las donadas grègas son pas d’agost mas de julhet.
En çò que tanh al caumatge masculin, es Espanha l’estat qu’enregistra las donadas piègers d’Euròpa, amb un caumatge de 25,6%, es a dire de 0,3% de mai qu’en agost, del temps que la taxa de caumatge entre las femnas pogèt a 26,1%, valent a dire a 0,3% de mai que lo mes precedent.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ah ! Reconoissi sus la fòto l'agéncia ANPE / Pole Emplec de la Jolieta, a Marselha, granda provesidoira de caumaires de lònga durada.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari