Lo Curdistan Oriental (estat iranian) es dins sa tresena setmana de cauma. De milièrs de botigas comencèron de barrar lo 15 d’abril en protèsta contra lo barrament de la frontièra amb lo Curdistan iraquian decretat pel govèrn d’Iran, çò rapòrta Nationalia.
 
La cauma l’an tanben joncha los nomenats kolbers, çò es los umils transportaires de mèrças d’un costat a l’autre de la frontièra politica, sovent illegalament a causa de las restriccions impausadas per Teheran. Eles patisson de frequents accidents e quitament son de victimas del fuòc dels soldats iranians.
 
Los curds de la region orientala an una granda dependéncia d’aquel comèrci amb lo Curdistan Occidental a causa de la militarizacion de l’economia e de la manca d’investiment del govèrn iranian dins la region, çò precisan de fonts curdas a Nationalia. En mai d’aquò, segon lo Ret dels Dreches Umans de Curdistan, lo recent blocatge de las frontièras e lo refortiment de las restriccions contra los kolbers an provocat lo fach que sièis milions de botiguièrs e d’entrepreneires an perdut lors afars e qu’entre 70 000 e 80 000 personas son ara sens emplec.
 
La cauma s’es estenduda dins divèrsas vilas curdas. Segon Nationalia, se debana mai que mai a Bane (Baneh en persan), Seqiz (Saqqez), Merîwan (Marivan) e Ciwanro (Javanrud). Segon aquelas informacions, los caumaires, per desenats de milièrs, s’organizan d’un biais autonòm via Telegram.
 
Segon la version oficiala iraniana, “d’agents estrangièrs” son darrièr la protèsta.
 
 

April 26- Baneh, #Kurdistan province  NW #Iran
General strikes by the merchants and shop owners in the town of Baneh, western Iranian Kurdistan province, entered its 11th day.#IranProtest#IranUprising#RegimeChange  #FreeIranpic.twitter.com/KCzIjyQilw

— Rashid (@MohammadiRashid) 26 d’abril de 2018