Comença uèi la 71a edicion del Festenal de Canas, un dels tres eveniments màgers del cinèma mondial amb la Mòstra de Venècia e los Oscars. S'agís d'un festenal fòrça popular e mediatic amb la preséncia de milièrs de jornalistas del Mond entièr que se ten cada an al país provençal de Vencenc. Ongan, Jornalet es un dels mèdias acreditats e poirem raportar l'eveniment sus plaça, amb un vejaire occitan.

Hollywood en Provença
 
Cate Blanchett, actritz d'Hollywood australiana, es la presidenta de la jurada, dos ans après èsser presenta dins la distribucion del filme en competicion Carol.  L'acompanha qui recebèt lo prèmi de la Jurada de 2017, lo realizaire rus Andrei Zviagintsev, qu'aviá concorregut anteriorament al palmarès, lo realizaire quebequés Dennis (Blade Runner 2049), lo realizaire marselhés Robert Guédiguian, l'actritz Kristen Stewart (Twilight), Chang Cheng (Chì Bì [pena roja]), la realizaira Ava DuVernay e la cantadora Khadja Nin.
 
La pauca preséncia hollywoodiana que trobarem en aquel festenal se concentrarà en partida dins las leiçons magistralas de Gary Oldman (The Dark Knight), Ryan Cooglar (Black Panther), John Travolta (Grease), e lo realizaire de succès Cristopher Nolan (The Dark Knight, Interstellar). Spike Lee atirarà, plan segur, l'atencion per son filme en concurréncia que tracha d'un negre infiltrat dins lo Ku Klux Klan. Ron Howard presentarà lo darrièr spin-off d'Star Wars fòra competicion. Veirem l’aparicion remarcabla de Penélope Cruz  e de Javier Bardem amb Ricardo Darín coma trio protagonista del filme de lenga espanhòla Todos lo Saben, lo filme inaugural del festenal de la man d'Asghar Fahrdi, realizaire persan, un visatge familiar del festenal qu'aviá ja ganhat lo prèmi del melhor scenari.
 

D'autors que i tornan
 
Canas pòrta un aire de familiaritat e de frescor als que seguisson l'eveniment cada annada. En mai de Fahrdi, i tornam rescontrar Pawilowski, lo ganhaire de 2015 amb lo recit polonés Ida. Lo realizaire indecent e de succès David Robert Mitchell (It Follows), que foguèt membre de la jurada de la setmana critica 2016, se presenta a la competicion pel tresen còp en cinc ans amb son filme Kore-Eda. O encara l'insigne francés Jean-Luc Godard reapareisserà amb un nòu filme bensai mai criptic que lo precedent.
 
 
LGTB
 
D'autre caire, Canas es una alenada d'aire fresc per la promocion dels filmes d'autor. Los prometedors del cinèma fan veire a Canas lor talent a tot lo Mond amb lor seccion "Un certan regard". Lo tèma LGTB es tanben fòrça present dins totas las seccions. De soslinhar l'estranh filme lesbian en swahili e en anglés de Wanuri Kahiu entitolat Rafiki (amiga), lo primièr filme de Kenya qu'arriba al festival, e lo filme Carmen y Lola de la basca Arantxa Echevarría que presenta la tension que vivon doas filhas de familha gitana quand s’enamoran una de l'autra.
 
 
Desterrats de la competicion
 
D'autres talents son benvenguts amb una desgaunhada. Lo discutit Lars Von Trier projècta fòra competicion The House That Jack Built après sa discutida conferéncia de premsa sus Melancholia en 2011, ont badinèt frivolament sul nazisme après aver importunat sas actrises principalas en dire qu'èra a preparar un filme pornografic de quatre oras per elas. Son sens de l'umor faguèt que, quand son filme "pornografic" Nymphomaniac èra prest, l'avián ja fòrabandit del festenal e que trigarián longtemps a tornar sus son admission.
 
Netflix es l’autre participant que solament un an puèi se sent coma l'eternal rival. Après s'installar en Euròpa, Netflix voliá ganhar lo sagèl de qualitat per sos filmes de produccion pròpria, mas l'organisme del festenal, en començant pel president de la jurada d’alavetz, Pedro Almodóvar, refusèron las doas produccions que Netflix i presentava. "Me sembla una enòrma paradòxa de donar una Palma d'aur, e quin autre prèmi que siá, a un filme que se pòt pas veire sul grand ecran", çò diguèt Almodóvar, cap de la jurada en 2017. Dempuèi alavetz las nòrmas per participar requerisson qu'un filme se projècte tanben dins las salas de cinèma francesas. Per aquela meteissa rason, la plataforma online HBO fa sa primièra fòra competicion amb una nòva adaptacion del roman de Ray Bradbury, Fahrenheit 451. Netflix a contunhat de cercar la reconeissença en rescontrant un destin similar als Oscars. L’enfant terrible de Netflix menaça de crompar de salas de cinèma per poder contornejar las nòrmas dins una demostracion de poder. En aquesta meteissa ocasion lo filme inacabat d'Orson Welles auriá agut per efièch que la quita filha de Welles escriguèsse una letra dobèrta per convéncer Netflix de reconsiderar sa decision de portar pas res a Cannes. Aital Netflix i presentarà The Other Side of The Wind amb desdenh.
 
Per contra, Amazon es una plataforma que s'es saupuda adaptar al modèl tradicional e aital a obtengut un Oscar per Manchester by the sea. Ça que la, ongan presenta pas res a Canas en seguida de la destitucion de son director Roy Price a causa d'un escàndol sexual. Aquò es una autra de las maitas istòrias desveladas dins l'encastre dels mèdias dempuèi lo cas del productor de Los Angeles, Harvey Weinstein; una estapa que Canas, siá a causa de revisions feministas siá per conviccion, vòl començar de daissar endarrièr.
 
 
 
Zep Armentano



 

fffff		fffff
	Ongan, Jornalet serà present al Festenal de Canas, d’ont vos raportarem, sus plaça, lo festenal de cinèma pus important d’Occitània e d’Euròpa.