Haití, que s’es pas encara recuperat del fòrt tèrratrem que patiguèt en genièr de 2010, subiguèt en agost passat los desastres de la tempèsta Isaac. Al delà, lo 24 d’octòbre passat, l’auragan Sandy daissava un dolorós bilanç al país en versant mai de 50 cm de pluèja en mens de 24 oras. Los degastes an daissat un grand nombre d’agricultors dins la mai granda inseguretat alimentària, mentre que las ONG an paur que l’epidemia del colèra siá màger.
Lo bilanç es pas encara definitiu, mas se parla ja de mai de 50 mòrts, 18 ferits e 15 desapareguts. Aperaquí 200 000 personas son estadas relotjadas.
Quant a las pèrdas materialas, l’auragan Sandy a destruit 70% de la culhida dins lo sud d’Haití, e las pèrdas en bestiar tanben son estadas considerablas. Segon lo jornal haitian Le Nouvelliste, “las pèrdas agricòlas s’estiman a 120 milions de dolars”. Aquò fa mai grèva la paura situacion alimentària del país. “Los prèses dels bens de primièra necessitat contunhan d’aumentar e fòrça manifestacions contra la vida cara an ja agut luòc”, çò apond lo jornal.
Segon lo Ministèri de l’Agricultura, fòrça agricultors paures, mancant d’ajuda, auràn “pas res de manjar” a causa dels damatges. Los degalhs tanhon sustot a las culturas d’avocats, de frucha de l’arbre del pan e de milhòc.
Al delà, las inondacions an polluit las resèrvas d’aiga potabla, çò qu’a plan favorit lo desvolopament del colèra, una epidemia qu’ataquèt ja lo país fa dos ans. Dempuèi 2010, lo colèra a tocat 600 000 personas en provocant mai de 7400 mòrts, segon Le Monde.
De fach, segon Le Nouvelliste, s’espitalizèt mai de 200 personas la dimenjada passada per aquela malautiá, e segon qualques organizacions umanitàrias, la gravetat de la situacion es fòrça mai granda.
Lo govèrn a demandat d’ajuda internacionala. Veneçuèla a ja anonciat que i manda 770 tonas d’aliments dont 530 tonas son dels que caducan pas. De son costat, l’Union Europèa, dimenge, planguèt lo dòl a totes los pòbles caribencs en tot se declarar “prèsta a sosténer los esfòrces de reconstruccion”.
Al delà, lo govèrn a anonciat que destinarà 6,3 milions d’èuros per ajudar las regions afectadas. Lo president de la Republica, Michel Martelly, e lo primièr ministre, Laurent Lamothe, comencèron divendres passat la distribucion de kits alimentaris.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Acabavi per pensar la l'aurassa se'n preniá son qu'als paises rics. Los USA son pas res mai qu'unes estats demèst d'autres. Eventualament, parlatz-nos de las nacions amerindianas, que son las nòstras sòrres despossedidas e en lucha. Subre la Còsta Est, los que i an daissadas plumas son los mai paures dels rics ; aquò se deu saber, plan segur. Mas qué ne virava dels mai paures dels paures ? Òsca, Jornalet : èra plan pro temps de ne parlar, enfin.
F E L I C I T A C I O N S per aqueth article.
En legissent l'article precedent , de Sandy sus New-York, avèvi enveja d'escríver que Sandy n'es pas passat sonque sus New-Yòrk, que ne se fau pas deishar préner per los media ipertrofiats deus Estats-Units, e oblidar tots los autes país on es anat tuar e semiar la desolacion, que son eths tan praubes e desconeishuts, que ne se'n poiràn pas tornar quilhar aisidament. Dens un país ric com los Estats-Units, sovent espausats aus ciclònes, la prevencion e l'educacion aus risques deurén estar hèitas , longtemps abans e tostemps, per limitar tot auvari, com se hè dens los D.O.M. de França, o au Japon .
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari