Lo president d’Itàlia, Sergio Mattarella, anoncièt diluns passat la malescasuda dels contactes per far un govèrn, e a prepausat de ne crear un de “nèutre” que guide lo país devèrs d’eleccions dins la davalada. Un dels principals partits a ja refusat de pachar un executiu interimari.
 
Mattarella aviá convocat, aqueste meteis diluns, una nòva tièra de consultas, en fasent ansin un darrièr esfòrç per resòlver la crisi politica que provoquèron las eleccions del 4 de març, que ganhèt la coalicion conservatritz formada de la Liga, d’Anem Itàlia (Forza Italia) e Fraires d’Itàlia, en nombre total de vòtes; totun, lo partit individualament pus votat foguèt lo Movement 5 Estelas.
 
Al començament, tant la coalicion coma lo Movement 5 Estelas se mostrèron dispausats a pactar, mas lo vèto de la formacion antisistèma a Anem Itàlia —partit de l’èx-primièr ministre Silvio Berlusconi— o a empedit. Tanpauc es pas estat possible de pachar amb lo Partit Democrata de Matteo Renzi.
 
“Après las consultas d’uèi, i a pas cap de possibilitat que sorgisca una majoritat d’un acòrdi politic”, çò diguèt diluns Mattarella del Palais del Quirinal estant. El excluguèt exprèssament la possibilitat d’un “govèrn en minoritat”, convencut qu'aquò menariá egalament devèrs de nòvas eleccions.
 
Mattarella expliquèt que los partits li avián demandat mai de temps per contunhar las consultas, mas el, e mai s’i siá mostrat dispausat, a considerat qu'Itàlia pòt pas mai perlongar la paralisi politica. “Permetètz que sorgisca un govèrn nèutre, de servici”, çò demandèt. Seriá en vigor fins en decembre e, se s’atenh un acòrdi politic, lo nòu executiu assumiriá lo govèrn del país sens arribar a la fin de l’annada.