An amassat mai de 31 000 signaturas contra la venda d’una parcèla de l'illa de Santa Margarida, davant la còsta de Canas (Vencenc). L'estat francés vòl mentre en venda la pèça qu'aculhís una basa nautica de 3204 m² recentament inaugurada sus l'illa.
 
Santa Margarida e tot l'archipèla de las illas de Lerins son un ben patrimonial d'excepcion, e a aquel títol la municipalitat de Canas s'es engatjada a las inscriure coma patrimòni mondial a l'UNÈSCO. Saique es per aquesta rason que lo cònsol màger de Canas, David Lisnard, s'es insurgit contra l'eventuala venda de la parcèla sus aquel “sit excepcionau e preservat ont leis enfants practican d'activitats”.
 
La peticion, lançada per Emmanel Racca, amassa mai de 31 000 signaturas. En abril passat, Racca explicava dins Nice-Matin que la venda de la parcèla èra una “aberracion inacceptabla”, mai que mai del temps que la comuna lucha cada jorn dins una politica de respècte de l'environament e de l'ecosistèma per i preservar la fauna e la flòra.
 
Dins aquel sens, convida a signar la peticion per “dire de non a tot projècte immobilier, quin que siga, mai dire de òc a la natura, au respècte de l'environament per lei generacions futuras”.