Lo jornal catalan VilaWeb ten una seccion entitolada Letras per la libertat, amb la tòca d’exprimir la solidaritat amb los presonièrs politics e los exiliats catalans, e a l’encòp per ne far difusion dels faches. Lo president de l’Assemblada de Corsega, Jean-Guy Talamoni, i mandèt fa qualques jorns una letra adreiçada al president de Catalonha en exili, Carles Puigdemont, que nos a semblat interessant de traduire e publicar dins Jornalet.

Sénher President:
 
Vos adreici aquestas linhas de Corsega estant, un pichon país de nòstra Mediterranèa comuna, ont lo pòble e las institucions seguisson de près los eveniments qu’an brandits Catalonha aquestes darrièrs meses.
 
En çò que me concernís a ieu, ai pas solament agut de contactes politics , mas tanben de relacions amistosas amb fòrça compatriòtas vòstres pendent de decennis. Los darrièrs ans, sèm estats presents dins las divèrsas consultas que se son fachas sus l’independéncia de Catalonha.
 
Tanben dins nòstre país lo desir de libertat s’es exprimit democraticament mejançant lo sufragi universal. En decembre de 2015, dins una votacion confirmada e ja aumentada dos còps, los còrses balhèron las claus de las institucions insularas al movement patriòtic, es a dire a la familha politica qu’a pas jamai considerat Corsega coma una entitat francesa, mas coma una nacion. Per ara, la situacion es blocada per París, que refusa clarament la democracia.
 
Lo 1r d’octòbre de 2017, èri a Barcelona quand vòstres compatriòtas votèron en favor de la creacion de la Republica Catalana. Qualques jorns abans, l’Assemblada de Corsega —que ne soi president— aviá emés un vòt formal en sosten a vòstre procès de referendum.
 
Observèrem amb consternacion la reaccion brutala e antidemocratica de Madrid, e tanben vegèrem la serena determinacion d’un pòble en marcha devèrs son destin.
 
Dempuèi alavetz, en Catalonha i a —coma en Corsega, de segur— de presonièrs politics e de personas jos mandats d’arrèst, comprés vos, Senhor President. Nòstra solidaritat politica e frairala es naturalament amb vosautres e amb totes los que coneisson la preson o l’exili.
 
Mas voliái tanben explicar ma fisança indestructibla en un futur de libertat, de patz e de bastison, tant per Catalonha coma per Corsega. Nòstra fòrça es immensa perque son nòstres pòbles que nos la donan, cada jorn, amb lor sosten.
 
En seguida de la persecucion a la quala sètz estat somés, avètz optat per vos refugiar a Brussèlas, lo còr de l’Euròpa politica. En o fasent, avètz manifestat tanben aquela esperança qu’avèm en comun: far sus nòstre continent d’una aliança de pòbles e de vertadièras nacions una realitat. Se los estats que constituisson l’Union Europèa vos an virat l’esquina dins una granda mesura e an clucat los uèlhs davant l’injustícia que se comet, sabèm tanben qu’aquela Euròpa a trobat sos limits e uèi afronta una admission de sa malescasuda. Per çò qu’es de nosautres, pòbles en camin devèrs la libertat, sèm los qu’encarnam l’avenidor, un avenidor desparièr. La volontat politica que sorgís en Catalonha, en Corsega, al Bascoat e en Escòcia es pas un problèma que menace los interèsses comunautaris, mas, al contrari, un projècte de solucion. Doncas, nòstra solidaritat es pas unicament indispensabla per nòstres respectius pòbles, mas es lo ciment de l’Euròpa de deman. Una Euròpa politica fòrta e frairala, capabla d’afrontar los enjòcs del sègle XXI.
 
Sénher President: me rèsta pas que de vos desirar que tengatz lo coratge qu’avètz demostrat fins ara, mas n’ai pas cap de dobte. Coma escriu Malraux dins L’espoir, un roman qu’es pas estrangièr a nòstra intencion: “Lo coratge es tanben una pàtria”. Dins aquel sens, los catalans e los còrses, eiretièrs de Francesc Macià e Pasquale Paoli, son d’un cèrt biais compatriòtas.
 
Mentre qu’esperam l’inevitabla victòria de vòstre pòble, que serà tanben la de la justícia, vos demandi que cregatz, Sénher President, en la seguretat de l’indefectibla amistat del pòble còrs amb lo pòble catalan.
 
 
 
 
Jean-Guy Talamoni, president de l’Assemblada de Corsega