Après la persecucion, las detencions e las gàrdias a vista, Canas a espandit lo tapís roge per Cédric Herrou. Se presentèt ièr al festenal de cinèma lo filme documentari de Michel Toesca sul prètzfach umanitari de Cédric Herrou e de l’associacion Ròia Ciutadana. Lo filme, fòra competicion, se tornarà presentar uèi per la premsa, e la còla de Jornalet ensajarem d'i assistir e de parlar amb sos actors màgers. Entitolat Libre (Liure), lo documentari explica lo prètzfach d’aqueles ciutadans roiasques qu’ajudan als migrants.
 
Produch per Jean-Marie Gigon e per SaNoSi Produccions, lo documentari s’es menat a bon tèrme gràcias al sosten d’Emaús França, de Mètges del Mond, de Res Publica, de Ròia Ciutadana e de KissKissBankBank, e s’es presentat a Canas en session especiala. Lo filme se poirà veire suls ecrans de cinèma a partir del 26 de setembre.
 
 
Refusan d’abandonar los migrants, sovent afamats e perduts
 
En agost de 2015, l’estat francés decidiguèt de barrar la frontièra a Ventemilha pels migrants e refugiats. A partir d’aquel moment, la Val de Ròia venguèt lo nòu ponch de passatge, ont es frequent de trobar de desenas de migrants a se pèrdre sus las estradas e los camins de montanha. Espontanèament, d’abitants roiasques lor venon ajudar. Son organizats al sen de l’associacion Ròia Ciutadana, e refusan d’abandonar los migrants, sovent afamats e perduts.
 
Demest aqueles roiasques solidaris se tròba Cédric Herrou, un agricultor de 37 ans d’origina niçarda, qu’es conegut per aver albergat en cò sieu plusors centenats de migrants. Es ja estat detengut cinc còps en gàrdia a vista e jutjat per aver portat socors a de migrants e refugiats. Mentretant, Herrou e l’associacion Ròia Ciutadana demandan “la legalitat per portar assisténcia”.