Giuseppe Conte, lo nòu primièr ministre d’Itàlia, auriá falsejat sus son curriculum vitæ. Conte i afirma qu’aviá assistit cada estiu, durant cinc ans, a de corses de l’Universitat de Nòva York, mas lo pòrtavotz d’aquel centre afirma que son nom es pas enregistrat ni coma professor ni coma escolan, çò rapòrta The New York Times. Aquela universitat privada nòvayorkesa ditz que tanplan benlèu Conte auriá fach un cors de solament dos jorns, car aqueles corses demòran pas enregistrats als archius.
 
D’autre caire, La Repubblica rapòrta una autra informacion dobtosa del curriculm vitæ de Conte, car ditz qu’a perfeccionat sos estudis juridics al Kultur Institute International de Viena, un centre qu’existís pas.
 
Lo president d’Itàlia, Sergio Mattarella, faguèt ièr una ròda de consultas abans d’encargar la formacion d’un govèrn a Conte. E mai se Conte es l’òme consensual segon lo pache entre lo Movement 5 Estelas e la Liga, es un òme sens cap d’experiéncia politica e la proposicion de son nom coma primièr ministre es estada precedida d’una davalada de la borsa e d’un aument de la prima de risc en Itàlia.