Un nòu telescòpi a fotografiat un trauc negre e sa bofiga de gas que l’environa. Lo trauc negre es sièis miliards de còps mai grand que lo Solelh.

Fa de desenas de milions d’ans, benlèu de centenats, que l’alonhada galaxia elliptica Messier 87 (M87), dos mila còps mai granda que la nòstra Via Lactèa, a un immens trauc negre, sièis miliards de còps superior al nòstre Solelh.
 
Malgrat aquelas chifras astronomicas, inimaginablas, lo nòu telescòpi Lofar, del consòrci neerlandés internacional Astron, a permés, pel primièr còp dins l’istòria, d’observar non solament aquel trauc negre, mas tanben sa bofiga de gas que l’environa e qu’es tan granda coma la quita galaxia.
 
Qualques traucs negres engolisson periodicament la matèria circondanta e la transforman en radiacion e en de particulas qu’atenhon la velocitat de la lutz, origina d’aquela immensa bofiga. Concretament, lo trauc negre d’M87 engolís cada qualques minutas tant de matèria coma n’a la nòstra planeta.
 
Ara, gràcias al nòu telescòpi, s’es pogut captar d’imatges de granda qualitat coma aquel, qu’al delà d’ajudar a comprene un pauc melhor lo fenomèn, suggerisson mai vivament l’immensitat de l’Univèrs.