Lo cantador de rap malhorquin, Josep Miquel Arenas, de nom d’artista Valtònyc, s’es exiliat. Ièr saupèrem que s’èra anat en Belgica dempuèi qualques jorns per evitar son encarceracion. La justícia espanhòla l’aviá condemnat a tres ans e mièg de preson per las paraulas de sas cançons, çò que descadenèt una avalanca de solidaritat e d’indignacion dins los Païses Catalans e endacòm mai.
 
Lo cantador èra susvelhat per la polícia espanhòla e totas las companhiás aerianas èran obligadas d’informar las autoritats se Valtònyc quitava l’illa. Pasmens, a capitat a partir en Belgica sens èsser detectat. Fa qualques setmanas o avertiguèt dins un concèrt: “Intrarai pas volontàriament en preson e me deuràn venir cercar”, çò diguèt del temps que ièr publiquèt un messatge sus twitter que disiá:
 
“Deman es lo jorn. Deman tombaràn la pòrta de mon ostal per me metre en preson. A causa de cèrtas cançons. Deman Espanha se ridiculizarà tornarmai. Lor o facultarai pas, desobesir es legitim e una obligacion davant aquel estat faissista. Degun se rend pas.”
 
 
Sosten del Parlament Europèu
 
Se tenguet ièr dijòus al Parlament Europèu un parladís sus la libertat de la premsa, ont s’evoquèt la situacion de Valtònyc. A l’eveniment participèt un representant del grop de sosten al cantador, qu’expliquèt que lo rapaire èra en Belgica per preparar sa defensa.
 
 
Manifestacions de protèsta
 
Mentretant, i aguèt ièr fòrça manifestacions de sosten al cantador malhorquin dins los Païses Catalans (Barcelona, Vila-Real, Castelhon, Alacant) e tanben en Madrid e Saragossa.
 
 
Condemnat a la preson per cantar contra lo rei
 
La justícia espanhòla condemnèt a tres ans e mièg de preson lo cantador hip-hop de Malhòrca per las paraulas d’una cançon contra lo rei emerit, Joan Carles Ir. Es estat condemnat per enaurament del terrorisme, injúrias a la corona e menaças, a causa de las paraulas d’una cançon, que podètz escotar dins lo vidèo çai jos. L’a jutjat e condemnat l’Audiéncia Nacionala espahòla, qu’es un tribunal d’excepcion que jutja los delictes de terrorisme.
 
La senténcia es de tres meses superiora a la que demandava lo ministèri public.
 
Durant lo jutjament, Valtònyc reconeguèt qu’aviá compausat aquela cançon a la demanda de Pablo Iglesias, lo numèro un del partit politic Podèm, per son emission de television La Tuerka.
 
En seguida, podètz veire e escotar la cançon en question. Las paraulas son en catalan, e i a de sostítols en espanhòl.
 

 
En mai d’aquò, fa qualques jorns, l’Associacion Unificada de Gàrdias Civils (AUGC) anoncièt que denonciariá tornar lo cantador per enaurament del terrorisme per aver cridat a tuar de Gàrdias Civils dins un concèrt.