Los irlandeses an decidit per referendum dereformar la lei de l’avortament, qu’èra una de las mai restrictivas d’Euròpa, e de ne despenalizar la practica. Dissabte coneguèrem lo resultat del vòte qu’aviá agut luòc la velha: lo 66,4% dels electors votèron per despenalizar l’avortament del temps que lo 33,6% diguèt de non. La participacion se situèt al 64%. Se poiriá parlar d’un referendum istoric, puèi que dins un país prigondament catolic coma Irlanda, l’avortament èra un afar tabó.
 
Fins ara, la lei permetiá los avortaments solament en cas que la vida de la maire foguèsse en perilh. Ara, se poirà practicar sense cap de restriccion pendent las primièras 12 setmanas de gestacion, e dins certans cases excepcionals, fins a las 24 setmanas.
 
Los partisans de cambiar la lei son contents del resultat. Segon Deidre Duffy, pòrtavotz de la campanha per l’òc, “se desvelha una nòva Irlanda” mentre que, per lo primièr ministre del país Leo Varadkar, “lo mond an parlat, e an dich qu’aqueste país es un país que se fisa de las femnas”.
 
Per contra, los partisans de manténer la lei, que comparava fins ara lo drech de la vida de la maire e lo del fètus, es una marrida nòva. Segon la representanta de la campanha antiavortament, Cora Sherlock, “es un jorn trist, un jorn devastaire, perque l’ochen emendament a fach un trabalh fantastic per protegir las gents d’Irlanda, las maires, per salvar de vidas”. Per ansin, Sherlock assolidèt que lucharián per tornar enebir los avortaments: “Nosautres contunharem. Aquò es pas la fin”.
 

Job done  #repeal   This is the most important referendum for women  I’ve ever voted in. Votáil Tá @Together4yes@Dundalk4Choicepic.twitter.com/7NWPudP47y

— Eire Libre (@Eire_Libre) 25 de maig de 2018