Del 21 al 23 de mai, l'Universitat de Lhèida aculhiguèt tornarmai d'estudiants e de professors d’occitan de l'Universitat de Tolosa – Joan Jaurés. Aquel escambi, que respondiá a la vesita que los catalans avián facha a la Ciutat Mondina dins lo mes passat, comprenguèt divèrsas leiçons academicas donadas per de professors occitans. Ansin, la professora Joèla Ginestet donèt un cors sus l’escrivan Ives Roqueta, lo medievalista Jacme Gourc s'interessèt al conegut Roman de Flamenca e lo lingüista Patric Sauzet clavèt las intervencions tolosanas en abordant lo ligam de Molière —figura clau de la literatura francesa— amb la lenga occitana. Aquelas jornadas, que foguèron dobèrtas amb l'intervencion del director del Departament de Filologia Catalana e de la Comunicacion, Miquel Pueyo, comprenguèron tanben una presentacion iniciala de Xavier Moral, de la Direccion Generala de la Politica Lingüistica de la Generalitat de Catalonha, que s'encarguèt d’analisar juridicament la reconeissença oficiala de l’occitan en Catalonha e Aran.
 
L’escambi foguèt tanben acompanhat de divèrsas activitats de léser coma de vesitas culturalas, de gastronomia, etc.
 
Atal s'assolida la collaboracion establa entre las doas universitats en matèria occitana, que se concretizèt fa qualques ans dins l'encastre d'un acòrdi Erasmus +, que permet que de professors e d'estudiants tolosans se pòscan desplaçar a Lhèida, e los lheidatans a Tolosa. Dins aquel sens, cal soslinhar que, l’an que ven, dos estudiants de Filologia Catalana e Estudis Occitans passaràn tot l’an a Tolosa e qu'una de las tòcas d’aquel sojorn deu èsser de perfeccionar lor formacion en filologia occitana.