Itàlia intrèt dimenge passat dins una crisi constitucionala sens precedent. Lo president de la republica, Sergio Mattarella, decidiguèt de refusar lo candidat al pòst de ministre de l’economia que li prepausava lo nòu govèrn de Giuseppe Conte, perque lo considèra tròp contrari a l’èuro. Aquela decision a fach renonciar a Conte a formar lo govèrn que l’aviá encargat de far lo pache entre la Liga e lo Movement 5 Estelas. De fach, aqueles dos partits an fach una crida a destituir Mattarella e convocar de nòvas eleccions, que vendràn, sens cap de dobte, un veritable referendum sus l’Union Europèa e l’èuro.
 
Lo president de la republica a mes son vèto a la proposicion de nomenar Paolo Savona coma ministre de l’economia, un òme qu’èra ja estat ministre de l’indústria e qu’a totjorn pensat que l’intrada d’Itàlia dins l’èuro èra estada una error. Matarella se tròba ara dins una posicion incomòda, bòrd que, coma president de la republica, deu demorar dins una posicion nèutra, e los partits que volián constituir un govèrn l’acusan d’obesir al diktat de Brussèlas.
 
 
Lo nòu govèrn rebutat per Mattarella aviá anonciat una tièra de mesuras que contravenián a las nòrmas de l’Union Europèa, dont refusar de pagar lo deute e de metre fin a las sancions contra Russia.
 
Sembla que la sola solucion, per ara, seriá de convocar d’eleccions que se poirián téner en setembre venent. Pasmens, plusors observaires afirman qu’aquelas eleccions vendrián un referendum sus l’èuro e sus l’UE.
 
 
Matarella prepausa a un naut foncionari de l'FMI que faga un govèrn

Mentretant, Mattarella s’es amassat amb Carlo Cottarelli, un naut foncionari del Fons Monetari Internacional. Lo president l’a encargat de far un govèrn provisòri que mene Itàlia devèrs de nòvas eleccions al començament de 2019.

Cottarelli a promés un govèrn nèutre e s'es engatjat a far un govèrn ont cap de membre serà pas candidat a las eleccions. De mai, a afirmat que se presentarà al Parlament amb un programa que comprendrà lo budget.