La justícia dels Païses Basses ven de metre a jorn lo registre civil per reconéisser l’intersexuacion. Un tribunal de Limborg ven de donar rason a un ciutadan qu’a demandat d’èsser pas inscrich coma òme ni mai coma femna. Nascut en 1961, foguèt inscrich coma òme per sos parents, mas en 2001 demandèt de cambiar aquela inscripcion per èsser registrat coma femna. Pasmens, se sentissiá totjorn mal e reclamèt als jutges de li reconéisser un “tresen genre nèutre” per tal d’aver lo drech a son “autodeterminacion personala, son autonomia e sa vida privada”.
 
De còps mal qualificada d’ambigüitat sexuala, l’adjectiu intersexual  designa normalament lo mond que son nascuts amb de caracteristicas sexualas que correspondon pas a las definicions tipicas del mascle e de la femèla. Es lo cas d’aquela persona limborguesa. Los parents l’inscriguèron coma persona de sèxe masculin pr’amor que segon los rapòrts dels mètges “creguèron que seriá mai aisit per lor enfant”.
 
La decision es estada aplaudida pel collectiu LGBT del país que la qualifica de “pas devèrs la bona direccion”. Totun, revendican qu’aquel tresen genre siá limitat al cas de l’intersexuacion e reclaman que “quin olandés que siá pòsca aver aquela opcion”. Atal faguèt Canadà en setembre passat: a las mençons tradicionalas “M” e “F”, que definissián respectivament los sèxes masculin e femenin, ajustèron una tresena mencion “X”, per totas aquelas personas que s’identifican pas amb cap dels dos genres.