Entre li lengas disponibli, entre lo norvegian nynorsk e l’oriya si pòu trobar l’occitan. De segur l’occitan es pas una lenga unica e unificada, mas en matèria de normalizacion dei còdes de lenga per l’informatica, lu nòstres amics de l’ISO acòrdan dins li sieus nòrmas ren qu’un còde per tot l’espaci occitan: "oc" ò "oci".

 

Alora, fin finala, cen que s’esconde darrier lo còde "oc" d’un sit web? E ben "depende" dau traductor dau sit. Sus aquest sit per exemple, auretz remarcat que la version niçarda es sus un nom de domeni diferent d’aqueu de la version francesa: http://oc.cagablea.net. Ai chausit coma còde de lenga per la version niçarda aquest famós "oc", justament per sègre l’estandard e èstre reconoissut (tecnicament) dei navigadors. Sus d’autres sits, lu sieus traductors an fach la chausida entre lu diferents dialèctes de la lenga d’òc, e si pòu que sigue quora de provençau, quora de gascon… Ma cau ben constatar que la màger part dau temps son lu nòstres vesins lengadocians, en grafia classica, qu’ocupan lo terren.

Finda se gaire de sits existisson en "occitan", e de mai que sabon gerir aquest còde, es util de configurar la vòstra lenga preferida per qu’acreisse li estatisticas dei internautas "occitanofòns". Aquò dona una certana visibilitat de la lenga e finda porria menar certans sits a decidir de prepauar una traduccion dins aquesta lenga a l’avenir, coma per exemple Facebook que lo refuda despí d’annadas.

 

En brèu, se siètz dubèrts à toi lu dialèctes d’òc pus prèst qu’au francés, vaquí coma procedir emb lu 4 grands navigadors actuaus: Firefox, Chrome, Internet Explorer e Safari.
 

 

 

1. Durbètz li Preferéncias.

Anatz dins la seccion "Contengut".

Dins la partida "Lengas", clicatz sus lo boton "Chausir…".

2. Una fenèstra si duerbe.

Dins la tiera despleganta, cercatz e seleccionatz "Occitan [oc]".

Clicatz sus lo boton "Ajónher".

 

 

 

 

3. Seleccionatz "Occitan [oc]".

Clicatz sus lo boton "Montar" fins tant que la lenga "Occitan" sigue enaut de la tiera.

Validatz emb "OK".

 

 

 

Es acabat!

 

 

1. Durbètz li Preferéncias.

Anatz dins la seccion "Opcions avançadi".

Dins la partida "Contengut web", clicatz sus lo boton "Lengas e paramètres dau corrector ortografic".

 

 

 

2. Sota la tiera dei lengas, clicatz sus "Ajónher".

 

 

 

3. Cercatz e seleccionatz "Occitan".

Validatz emb "OK".

 

 

4. Li lengas son afichadi per òrdre de prioritat, la mai prioritària damont. Per "montar" l’occitan, fètz-o emb un resquilhar-pauar.

 

 

 

Es acabat!

1. Durbètz li Preferéncias e dins la seccion "Aparéncias", clicatz sus lo boton "Lengas".

 

 

 

2. Una fenèstra "Lengas" pareisse. Normalament, avètz lo francés enaut de la tiera.

Clicatz sus lo boton "Ajónher…".

 

 

3. Una autra fenèstra pareisse; l’occitan es pas dins la tiera dei lengas conoissudi d'IE.

Entratz "oc" dins lo camp "Personalizada:"

Validatz emb "OK".

 

 

4. Seleccionatz la lenga "Personalizada [oc]" dins la tiera.

Clicatz sus lo boton "Montar" fins tant que sigue enaut de la tiera.

Validatz emb "OK".

 

 

Es acabat!

1. Durbètz li Preferéncias Sistèma.

Anatz dins la seccion "Lenga e tèxt".

 

 

2. Clicatz sus lo boton "Modificar la tiera…".

3. Cercatz e oscatz la lenga "Occitan".

Validatz emb OK.

 

 

4. Fètz resquilhar la lenga "Occitan" enaut de la tiera.

 

Es acabat!

Un còup la configuracion facha auretz de fes que i a la bòna sospresa de veire certans sits passar en "occitan". Anatz per exemple sus google.fr!