La justícia espanhòla a condemnat a de penas de 2 a 13 ans de preson los uèch joves d'Altsasu (Bascoat) per una bagarra de bar amb dos agents de la Gàrdia Civila e lors femnas. E mai se lo tribunal los a relaxats de l'acusacion de terrorisme que l’aviá facha lo ministèri public, los jutges afirman que i aguèt abús de superioritat e d'òdi e que los joves "agiguèron motivats per l’ostilitat e lo mesprètz de la Gàrdia Civila e per de rasons clarament ideologicas".
 
Atal, l'Audiéncia Espanhòla (un tribunal d'excepcion especializat dins los crimes de terrorisme) a condemnat Oihan Arnanz e Iñaki Abad a 13 ans de preson, Jokin Unamuno e Adur Ramírez de Alda a 12 ans, Jon Ander Cob, Julen Goikoetxea e Aratz Urrizola, a 9 ans e Ainara Urkijo, a 2 ans de preson. Levat d'Ainara Urkijo, qu'es estada condemnada per un delicte de menaças e trebol de l'òrdre public, los autres acusats los an condemnats pels delictes d'atemptat a d’agents de l'autoritat e per lesions. Dins lo cas d’Iñaki Abad e d'Oihan Arnanz, los an tanben condemnats per trebol de l'òrdre public.
 
La cort a refusat que s'agiguèsse d’una bagarra de bar o d'un pichon incident o d’una garrolha, coma afirmavan los avocats dels joves, mai que mai perque los policièrs èran a beure un còp sens portar l'unifòrme.
 
Los faches se passèron lo 15 d’octòbre de 2016, a cinc oras del matin. Se tenguèt alavetz una bagarra nocturna de bar dins la vila d'Altsasu (Bascoat) ont dos agents de la Gàrdia Civila sens unifòrme e lors companhas foguèron nafrats. Lo ministèri public acusèt de terrorisme los sèt jovents e la joventa ara condemnats, que foguèron ja meses en detencion provisòria lo 14 de novembre de 2016.