Lo nòu ministre italian de la familha e de l’andicap, Lorenzo Fontana, a descadenat la polemica en assolidant que las familhas formadas per d’omosexuals existisson pas e que trabalharà per descoratjar los avortaments, çò rapòrta Jornada.
 
E mai, dins la legislatura passada, Itàlia aprovèsse lo maridatge per totes, Fontana a afirmat dins una entrevista que las familhas formadas per de personas del meteis sèxe "existisson pas per la lei en aqueste moment".
 
Fontana es ara lo ministre de la familha del nòu govèrn de Giuseppe Conte, constituit pels populistas del Movement Cinc Estelas e de La Liga. A 38 ans e es licenciat en sciéncias politicas. El considèra que la bassa natalitat es "un vertadièr problèma" per Itàlia e per Euròpa, e crei per qu’es essencial d’inversar lo desequilibri qu’existís entre lo nombre de personas vièlhas e los joves. "Economicament la situacion es tanben insostenibla. Se ditz qu’Euròpa es a envielhir e qu’a de besonh d’immigrants. Ça que la, ieu cresi que çò que cal far es aver d’enfants".
 
Las declaracions de Fontana se produson qualques jorns après que lo cap de la Liga, Matteo Salvini, diguèt fa qualques jorns que los enfants "an una maire e un paire e non pas progenitor 1 e progenitor 2". Ça que la, après las criticas de las declaracions de Fontana, lo lidèr ultradrechista a assegurat que "Fontana es liure d’aver sas idèas, mas aquestas son pas una prioritat e son pas dins lo programa de govèrn".
 
Las declaracions de Fontana an fòrça desagradat, mas el assegura que l’atacan per sas conviccions catolicas, çò rapòrta La Repubblica.