Àustria a entamenat una ofensiva contra “l’islam politic” amb la tòca de percaçar de desenats d’imams e de barrar qualques mosquetas que se sospiècha d’èsser finançadas per Turquia. “Las societats parallèlas, l’islam politic e l’extremisme an pas lor plaça en Àustria”, çò afirmèt divendres passat lo cancelièr del país, Sebastian Kurz, que vòl combatre lo finançament exterior de grops religioses.
 
Segon lo ministre de l’Interior, unes 60 imams e lors familhas serián concernits, e ansin aperaquí 150 personas perdrián lor drech de residéncia.
 
Per ara, una quarantena d’imams son estats meses en examen e poirián èsser expulsats per aver mancat a una lei de 2015 qu’enebís als predicadors e als sits de culte musulman de recebre de fonzes de l’estrange.
 
Lo govèrn d’Àustria es una coalicion entre lo partit conservator e l’ultradrecha. Justament Àustria assumirà lo 1r de julhet la presidéncia de l’Union Europèa, e lo quite cancelièr Kurz a assegurat que metrà l’accent sus la proteccion de las frontièras exterioras. Ditz qu’ensajarà de resòlver la question migratòria, que devesís ara los estats membres de l’Union.
 
Turquia a denonciat la mesura coma “islamòfoba” e “racista”.
 
En Àustria, demòran environ mièg milion de personas de tradicion musulmana, dont la majoritat d’origina turca e bosniana, çò que representa lo 6% de la populacion del país de majoritat catolica.
 
 
Reconstitucion de la batalha de Gallipoli
 
La decision del govèrn austrian es estat presa après la polemica que l’a generada la reconstitucion, dins una mosqueta de Viena, de la batalha de Gallipoli (1915), un eveniment istoric de la Primièra Guèrra Mondiala qu’es vengut un simbòl de l’istòria de l’Empèri Otoman.
 
Dins aquela reconstitucion aurián participat plusors joves menors vestits coma de soldats, segon qualques mèdias. Los imatges qu’aquestes an publicats an descadenat lo debat sus çò que s’ensenha dins las mosquetas de l’associacion austroturca ATIB, considerada pròcha del partit islamista del president turc Recep Tayyip Erdoğan.