En coïncidissent amb las eleccions presidencialas dels Estats Units, los puertoricans decidiràn entre independéncia, integracion o confederacion.

Lo Mond s’arraparà deman a las eleccions estatsunidencas per saber se Barack Obama poirà governar quatre ans de mai o se deurà daissar la presidéncia a Mitt Romney.
 
Ça que la, en Puerto Rico, lo debat se centrarà tanplan sul futur de l’illa, perque s’i votarà per l’estatut politic d’aquel estat liure associat als Estats Units. Sus lo bulletin i aurà doas questions: “Vos conven la situacion actuala?” e “Quina situacion futura volètz?”
 
La segonda question se completa amb tres opcions: l’independéncia, l’integracion totala als Estats Units, e l’estatut d’estat liure sobeiran associat, qu’es la situacion qu’a ara.
 
Entre los tres grands partits del país, lo Nòu Partit Progressista defend l’integracion totala, que convertiriá Puerto Rico en l’estat 51n de l’Union; lo Partit Independentista demanda lo vòte per l’independéncia; e lo Partit Popular Democratic prepausa de manténer la situacion actuala.
 
Se los electors vòtan majoritàriament en favor de la primièra question (“Vos conven la situacion actuala?”), los vòtes de la segonda opcion comptaràn pas.