Los 629 migrants salvats en Mediterranèa son en camin devèrs Valéncia après qu’Itàlia e Malta los an empachats de desembarcar. Dos vaissèls de la marina italiana e dels gardacòstas acompanhan l’Aquarius, en menant 500 migrants del temps que 129 d’eles demòran sus l’Aquarius.
 
Segon lo pòrtavotz de Mètges Sens Frontièras (MSF), Aloys Vimard, lo viatge fins a Valéncia durarà 4 o 5 jorns, çò qu’es tròp per aquelas personas “que se tròban ja dins una situacion extrèma, amb d’enfants e de malauts”. Per ara, las autoritats italianas an mandat de medicaments e de noiridura als batèls. Mas per Vimard “seriá estat melhor de desembarcar las personas socorregudas al pòrt pus pròche per que posquèsson èsser transferits en Espanha o devèrs quin autre país que foguèsse”.
 
Segon MSF i a de desenats de personas en situacion delicada qu’an ingerit d’aiga salada e qu’an patit d’ipotermia e de cremaduras. “Aqueles pacients son susvelhats perque pòdon desvolopar rapidament de problèmas pulmonars importants après aver aspirat d’aiga de mar. E mai i a 21 pacients qu’an patit de brutladuras quimicas grèvas, perque son estats expausats a una mescla toxica d’aiga de mar e de combustible pendent fòrça oras, e lor caldrà cambiar los pensaments dins los jorns avenidors.”
 
Per tot aquò, l’organizacion avertís que lo viatge serà riscat, e insistisson per que se cèrque una autra solucion.
 
Dins aquel sens lo govèrn de Corsega a prepausat d’aculhir los refugiats, mas per ara l’an pas aprovat las autoritats francesas.
 
 

Manque de vivres, mauvaises conditions météo, et port espagnol trop éloigné : face à l'urgence, le Conseil exécutif de Corse propose à @SOSMedFrance d'accueillir l'#Aquarius dans un port #Corse

— Gilles Simeoni (@Gilles_Simeoni) 12 de juny de 2018

 
 
La nòva estrategia d’Itàlia
 
De fach, la majoritat dels migrants de l’Aquarius foguèron socorreguts per de naus de la marina italiana, que los transferiguèron dins lo vaissèl de l’ONG francesa SOS Mediterranée. Aquela estrategia e lo refús posterior d’aculhir los migrants de l’Aquarius dins cap de pòrt italian, contrasta amb lo fach que ièr dimars desembarquèt a Catània un naviri de la marina italiana amb gaireben un milièr de migrants salvats.
 
Dempuèi l’an 2013 son arribadas sus las còstas d’Itàlia unes 700 000 personas migrantas e refugiadas. Fa qualques ans que los successius govèrns italians reclaman a l’Union Europèa de se partejar las personas per aculhir. Ara lo nòu govèrn, amb lo cap de la xenofòba Liga Nòrd, Matteo Salvini, a començat una nòva estrategia.
 
Cossí que siá, Matteo Salvini se regaudís d’aver atench son objectiu d’empedir lo desembarcament dels migrants en Itàlia.
 

VITTORIA!
629 immigrati a bordo della nave Aquarius in direzione #Spagna, primo obiettivo raggiunto! #chiudiamoiportipic.twitter.com/dNmLyNRaVo

— Matteo Salvini (@matteosalvinimi) 11 de juny de 2018

 
 

UPDATE: People onboard #Aquarius are getting increasingly anxious and desperate. #MSF has informed everybody about current situation. One man threatened to jump overboard, saying he was scared he would be returned to #Libya. pic.twitter.com/n0pR8a6Cu0

— MSF Sea (@MSF_Sea) 11 de juny de 2018