Polemica per l’arrestacion e extradicion en Espanha de la militanta de Batasuna venent del Bascoat Nòrd, ont aquel partit es legal. Lo govèrn francés se desinterèssa dels faches. Hollande participèt a una manifestacion contra la pretension espanhòla, abans d’èsser president.

L’arrestacion d’Aurore Martin, facha per la polícia francesa en compliment d’un òrdre d’arrestacion de la justícia espanhòla, e lo sieu transferiment dins una preson de Madrid, an generat una enòrma polemica dins l’Estat francés. Espanha reclama Martin en l’acusant d’èsser dirigenta de Batasuna, una organizacion considerada terrorista dins l’Estat espanhòl mas qu’es legala dins l’estat francés. Martin es ciutadana francesa e la siá extradicion a levat tantas protèstas que lo govèrn francés s’es vist obligat d’afirmar que se podiá pas empedir l’arrestacion perque veniá d’un mandat judicial europèu.
 
Dins una comparucion publica, un centenat d’elegits de totas las sensibilitats politicas e de membres del collectiu Bake Bidea (Camin de la Patz) an demandat d’explicacions al govèrn francés per l’arrestacion e l’extradicion de Martin, que risca una demanda de preson de fins a dotze ans.
 
Denóncian que Martin èra perseguida dins l’estat espanhòl que per un delicte d’opinion e an apelat a un acamp de protèsta uèi, a Baiona (Baish Ador). L’Audiéncia Espanhòla acusa Aurore Martin —militanta activa de Bake Bidea— d’aver participat a de reünions publicas en qualitat de sòcia de Batasuna, partit illegalizat dins l’estat espanhòl mas legal dins l’Estat francés. Los tribunals espanhòls lancèron a la fin de 2010 un mandat d’arrestacion europèu contra Martin, que desapareguèt alavetz de la vida publica, mas que i tornèt fa qualques meses.
 
Aurore Martin foguèt arrestada dijòus per de gendarmas pendent un contraròtle estradièr. Foguèt sul pic liurada a las autoritats espanhòlas, que n’avián sollicitat l’extradicion, ja que lo Tribunal de Pau (Bearn) aviá acceptada aquela demanda d’extradicion arunan. Èra lo primièr còp qu’un tribunal de l’Estat francés acceptava d’extradir un sòci de Batasuna de ciutadaniá francesa. Dissabte, lo jutge de l’Audiéncia Nacionala espanhòla, Pablo Ruz, mandèt Aurore Martin  en preson après li imputar un delicte d’integracion de banda armada en qualitat de dirigenta.
 
 
Polemica dins l’Estat francés
 
La decision del govèrn francés es estada refusada per de politicians d’esquèrra e de drecha, e quitament tres parlamentaris del PS, qu’es lo partit del president François Hollande, an criticat lo ministre de l’Interior, Manuel Valls, per complir un òrdre europèu qu’aviá pas aplicat lo sieu predecessor (lo del govèrn Fillon jos la presidéncia de Sarkozy). Valls a respondut a las criticas en disent qu’el a pas res a veire e que l’aplicacion de l’òrdre d’arrestacion espanhòla èra automatica. Lo tèma es estat portat a totes los informatius e jornals de l’estat, en provocant una enòrma polemica. Per contra, dins los mèdias de l’Estat espanhòl, se’n parla pas gaire.
 
Divèrsas associacions se demandan cossí es possible qu’una ciutadana francesa, sòcia d’una organizacion legala en França, pòsca èsser liurada a las autoritats espanhòlas solament pel fach qu’en Espanha aquela organizacion es pas legala.
 
Lo president de la republica, François Hollande, aviá participat a una manifestacion en 2011, abans d’èsser president, contra la persecucion per Espanha d’Aurore Martin.
 
 
Criticas d’EH Bildu e del PNB
 
Dins lo Bascoat Sud, La dirigenta d’EH Bildu, Laura Mintegi, a soslinhat que l’arrestacion e l’empresonament avián pas cap de basa politica ni juridica. A afirmat que lo govèrn espanhòl “empedís un procès de patz”. Del sieu costat, lo Partit Nacionalista Basco (PNB) a criticat los faches “chocants”, segon de paraulas del sieu president, Andoni Ortuzar, qu’a remembrat que l’arrestacion s’es facha dins l’encastre d’una lei dels partits que correspond a una estapa politica “ja superada”. S’agís d’una lei dels partits basada sus l’afirmacion que tota l’esquèrra independentista basca es ETA.