La Cort de Justícia Generala de l'Union Europèa confirmèt ièr que la cap del Recampament Nacional (RN, èx-Front Nacional), Marine Le Pen, deviá tornar al Parlament Europèu 294 497,87 èuros pr'amor qu'engatgèt amb d'argent de l'UE un assistent que trabalhava pas per la tòca de l'eurocambra.
 
Lo Parlament Europèu acusa la lidèr ultradrechista francesa “d'aver pas portat cap de pròva que l'assistent logat aja desvolopat una activitat restacada, d'un biais efectiu, dirècte e exclusiu, a son mandat parlamentari”. La justícia pensa çò meteis. De mai, los jutges europèus considèran que “Le Pen a pas recebut de tractament discriminatòri e tendenciós, pr'amor qu'ela a pas portat cap de pròva que lo Parlament aja dobèrt solament de proceduras similaras, dins lo passat o a l'ora d'ara, contra los eurodiputats del Front Nacional”.
 
Segon lo tribunal, la decision del Parlament Europèu d’exigir lo retorn de l'argent es apropriat, e se refusa “totas las allegacions” de Le Pen. Concretament, los jutges dison que lo Secretari General del Parlament Europèu es “competent per adoptar de decisions de recobrament de somas degudament pagadas dins l'encastre de las mesuras d’aplicacion de l’estatut dels deputats del Parlament Europèu” e qu'o “far pas ataca l'independéncia dels eurodeputats”.
 
En mai d'aquò, lo tribunal considèra que Le Pen “aguèt l’escasença de defendre adeqüatament son vejaire” e que “s’es pas violat sos dreches a la defensa”. Pels jutges, la cap de l’RN “a presentat pas cap de pròva que permeta de demostrat que recebèt l'assisténcia dirècta de son assistent dins los locals del Parlament, e sa simpla preséncia en aqueles locals, allegada mas non pas demostrada, constituís pas una pròva sufisenta”.
 
Ara, la presidenta del partit ultranacionalista francés pòt far apelacion de la decision de la cort europèa amb un recors de cassacion, dins un relambi de dos meses, davant la Cort de Justícia de l'UE.