Dissabte passat, s’amassèt a Aurenja (Comtat Venaicin) lo movement d’extrèma drecha Bloc Identitaire (Blòc Identitari), en tot festejar sos dètz ans d’existéncia. Los ultranacionalistas franceses an per tòca de se presentar a la eleccions municipalas de 2014 e an aculhit dins lor congrès l’eurodeputat italian de la Liga Nòrd, Mario Borghezio.

A la tribuna, aquel responsable italian de la Liga Nòrd foguèt ovacionat maites còps, sustot quand diguèt en francés: “Viscan los blancs d’Euròpa, viscan nòstra identitat, nòstra etnia, nòstra raça”.
 
A son torn, lo president del Bloc Identitaire, Fabrice Robert, qualificava lo primièr secretari del PS francés, e ancian president d’SOS Racisme, de “petit kapo de camp de reeducacion antiracista”.
 
Una autra de las intervencions de soslinhar foguèt la de l’ancian deputat de l’UMP, Christian Vanneste, conegut per sas polemicas omofòbas. Vanneste parlava dels “enemics comuns” qu’atemptan contra l’existéncia de “nòstre país” (voliá dire França), que ne planhiá d’atacas “a son identitat, a sa perennitat, a sas valors”.
 
Lo quite cònsol d’Aurenja e deputat d’extrèma drecha, Jacques Bompard, mandèt un messatge de sosten a la convencion xenofòba.
 
 
A las eleccions municipalas de 2014
 
Dins una conferéncia de premsa, los caps del Bloc Identitaire anoncièron tanben lor intencion de se presentar a las eleccions municipalas de 2014, amb l’espèr de s’aliar amb lo Front National.
 
 
De mascas de pòrc e d’allusions a Carles Martèl en 732
 
Los estands del Palais dels Princes d’Aurenja vendián de mascas de pòrc a un èuro e, tanben, se podiá comprar de camisetas que disián en francés “732, se recuèla pas mai”, en fasent allusion a l’an ont Carles Martèl arrestèt l’armada sarrasina a Peitieus.
 
 
Empedisson l’intrada a un jornalista de l’AFP
 
Lo jornalista de l’AFP que seguissiá la convencion i se vegèt refusat l’accès, dimenge matin, pr’amor que los organizaires l’acusèron d’una “cobertura desequilibrada” de l’eveniment.
 
Los amassats reprochèron a l’AFP de balhar tròp d’importància a l’intervencion del deputat de la Liga Nòrd, Mario Borghezio, e a las ovacions que recebèt amb sas proclamacions de supremacia raciala.