L'occitan e lo basco son ara lengas reconegudas per l’Establiment Public de Cooperacion Intercomunala, o l’ÈPCI del Bascoat (o Euskal Herriko Hirigune Elkargokoa, en basco). Los representants de las 158 comunas de l'ÈPCI del Bascoat (que conten lo Bascoat Nòrd, lo Bas Ador e Gramont) votèron al 90% dissabte passat per la reconeissença de las doas lengas autoctònas. Atal, las lengas oficialas de l'ÈPCI son lo basco, l'occitan gascon e lo francés.
 
Aquela ofèrta plurilingua poirà èsser utilizada pels servicis a la populacion e la comunicacion de la collectivitat, çò rapòrta Sud Ouest.
 
Un ÈPCI es un tipe d’estructura administrativa francesa qu’amassa de municipalitats e met en comun de competéncias municipalas. Lo nòu ÈPCI basca fusiona dempuèi genièr passat las dètz comunautats de comunas qu’existisson a l’ora d’ara en Bascoat Nòrd, Bas Ador e Gramont. Demièg sas competéncias i a lo desvolopament economic, las politicas urbanas, las gestions de las bordilhas e de l’aiga. La lei francesa permet als ÈPCI d’aspirar a gerir de competéncias suplementàrias, dont de culturalas, d’environamentalas, de lingüisticas e de ligadas a la cooperacion transfrontalièra.
 
La constitucion d’aquela entitat basca dins l’estat francés es seguida amb un interés especial en Catalonha Nòrd, a causa del fòrt movement de refús del nom de la nòva region qu’a pres lo nom d’Occitània sens mençonar l’inclusion del país catalan.