Contunhan las accions de protèsta a Montmaurin (Nebosan) contra l'implantacion d'una peirièra e pel patrimòni arqueologic. Lo Comitat Comengés e Savés del movement Bastir crida ara a participar a un picnic ciutadan dimenge que ven, lo 1r de julhet, a l'intrada de las Gòrjas de la Sava. A la seguida del dinnar se prepausarà una vesita dels sits sensibles de la comuna. "Cau saber qu'un projècte de peirièra industriala menaça las Gòrjas de Sava e mès generalament la comuna de Montmaurin, rica de sos vestigis preïstorics e istorics remirables", çò dison los organizaires.
 
 
Defendre lo país, lo patrimòni natural e arqueologic
 
Vòlon defendre l’environament de Montmaurin, en particular las gòrjas de Sava, mas tanben la dignitat del país, car “daissar implantar una peirèra industriala sus Montmaurin mòstra lo mesprètz pregon de l’estat francés rapòrt au patrimòni naturau mès sustot istoric occitan”.
 
En mai d’aquò, defendon un ric patrimòni istoric e arqueologic. Es aquí que se trobèt la Vènus dera Espuga, una figurina del paleolitic talhada en evòri de mamot, que s’expausa ara dins un musèu de París e que li dison en francés “Vénus de Lespugue”. Tanben se i trobèt una maissa de l’òme de Neandertal que fa partida dels fossils pus vièlhs d’Occitània.
 
Mas sustot cal soslinhar la vila romana de Montmaurin, una de las ciutats romanas màgers servadas dins tota sa superfícia de doas ectaras. Bastida entre los sègles Ir e IVn, es una mena de palais amb quitament un temple, una cort d’onor, de dependéncias, de tèrmas, un frigidarium, un atrium, un bacin, de mosaïcs...
 
 
Espoliacion del patrimòni arqueologic
 
Lo collectiu de Montmaurin nasquèt en seguida de l’espoliacion que la patiguèt lo musèu arqueologic de la vila. Al començament de decembre los gendarmas ne vogèron per fòrça las doas salas davant las protèstas dels oposants. Oficialament, las autoritats volián portar las pèças dins un musèu nòu e public.
 
Dins aquel sens, lo collectiu “demanda que las pèças desviradas per l’estat francés sian tornadas dins un musèu comunau adobat, que l’idèa n’estèc votada peu conselh municipau de Montmaurin lo 24 de junh de 2016. Aqueste musèu, restaurat dab un còst rasonable, seriá menat per la comuna dab l’ajuda deus servicis de l’estat”.
 
Lo collectiu afirma qu’es determinat a “engatjar totas las accions adaptadas tant au près de la populacion com au près de las elegidas e deus elegits entà sauvar aqueste patrimòni”.
 
Segon de fonts oficiosas, la voidança del musèu correspondriá a una repression estatala contra los qu’an menat una campanha de lucha contra un projècte de peirièra a Montmaurin.