Almens 19 personas mòrtas e mai d’un vintenat de nafradas es lo tragic bilanç d’un atemptat amb bomba a Jalalabad (Afganistan). L’ataca s’es producha durant la vesita de la vila pel president del país, Ashraf Ghani. Demest los mòrts, dètz fasián partida de la comunautat religiosa e culturala sikh.
 
L’explosion l’a provocada un assalhidor suicidari près de la residéncia del governador de la província de Nangarhar, ont Ghani participava a una reünion dins l’encastre de sa tornada a travèrs del país. Justament èra a rescontrar los representants de la comunautat sikh qu’anavan a la reünion.
 
Lo president Ghani èra anat aquí per explicar que voliá trobar un acòrdi de patz amb los talibans, après l’alta al fuòc pachada temporàriament per avalorar las possibilitats de negociacion.