La calor bèla d'aquesta fin de junh e debuta de julh a pas empachat los jogaires de XIII de córrer e córrer encara, de defendre, de marcar d’ensages sus un ritme sostengut
 

E lo campion es… Avinhon!
 
Suspresa en Elèit 1. D'en primièr, amb la desqualificacion de Sant Estève-XIII Catalan per la Commision de Disciplina per aver fait jogar dos jogaires qu'aurián pas degut jogar segon un reglament ont una gata auriá de mal a trapar sos pichons. Es doncas Avinhon que desfisava los limosencs aqueste dimenge sus la pelena de l'Estadium albigés. Limós qu'aviá per tòca de tornar un tresen trofèu, e puèi faire lo torn de las Arcadas per una serada carnavalesca e festiva fòra programa!
La calor empachèt pas las doas formacions de prepausar una partida de tria als espectators.
 
Limós dobriguèt la marca d'entrada per un ensag de son centre Garrouste, mas Avinhon replicava per l'arrièr Diamond intercalat e passava davant mercé a la transformacion del canton d'Arnaud. Lo tresena-linha audenc Roch profeitava d'una patanada de l'arrièr provençal per marcar. Limós ajustava un novèl ensag tre lo remandadís per Puso: 16-6 amb las 2 transformacions passadas per Murcia. Lo centre blau e blanc Saïa Tanginoa puntava en fòrça. Limós ajustava una penalitat; Diamond signava un segond ensag alara que Limós jogava a 12 (carton jaune) e Murcia clavava la marca del primièr temps per una penalitat: 20-14 a la pausa pels audencs.
Tre la represa, Murcia passava un novèla penalitat: 22-14. La partida montava en intensitat e Avinhon accelerava per marcar tres ensages e menar 30-22 a la 55a minuta. Limós tentèt, daissèt tombar paumas, tornèt marcar per Garrouste. Murcia transformava e Limós tornava a dos punts: 30-28. La defensa d'Avinhon teniá còp. Los provençals escartavan sus l'ala, Tanginoa traucava sus un quarantenat de mètres e servissiá son alièr Ghanem : 34-28. Tròp malaisits, los limosencs capitèron pas de tornar a la nautor dels Bisons abans la còrna.
 
Avinhon podiá sautar de jòia. Paradoxalament, aquel bastion del XIII s'èra trapat un sol còp en finala del campionat. Èra en 1957 a l'Estadium de Tolosa contra lo XIII Catalan: desfaita 14-9.
 
Es doncas lo primièr còp que lo planchòt, lo bloquièr-trofèu Max-Rousié, passarà una annada dins la Ciutat dels Papas!
 
En dobertura, cò dels juniors, los joves Catalans de St Estève-XIII Catalan mestregèron una partida amb d'acceleracions qu'anèron mai d'un còp darrièr la linha d'Avinhon per ganhar 54-18.
 
L'aiga es bona per la santat dels Dragons
 
Nos en còsta de vos dire aquò, mas cossí faire autrament quand lo mesclanha dels Dragons es nomenat òme de la partida per aver, entre d’autres, marcat tres ensages e passat  sièis transformacions : un jogaire que se sona Drinkwater, çò que vòl plan dire «Bèu l’aiga»! Mas la victòria fàcia a Castleford (e una de las bèlas: 44-16 ) es una òbra collectiva per una esquipa catalana qu'a trapat son equilibri, una solidaritat en defensa e de sosten e d'iniciativas per las atacas e tanben lo sosten bèl de son public.
 
Coma Leeds e Huddersfield an agut la bona idèa (pels catalans) de pèrdre: los Gigants cò d'Hull KR (10+37) e los Rinocèros a Wigan (8-46), vaquí los Dragons en setena posicion al classament amb un punt d'avança sus sos dos concurrents e a dos punts de Wakefield ont los Sang e Aur jogaràn aqueste dissabte 7. Demorarà encara tres partidas per confirmar la preséncia catalana dins lo Super 8: a Warrington lo dijòus 12, la recepcion de Salford a Brutus lo dissabte 21 e, per acabar aquesta primièra fasa, un desplaçament a Wigan lo dissabte 28 de julh. Als Dragons de persègre sus la lançada de la victòria suls Tigres!
 
Del costat de Leeds, los dirigents an decidit de cambiar l'entraïnaire: exit Mac Dermòtt e sas uèit sasons al club marcadas per quatre Superligas ganhadas e doas cups!
 
Tolosa domina las Aglas
 
En Championship, Tolosa es segond darrièr Toronto: una plaça que compta plan servar per disputar la pola de monta-davala amb la Superliga a comptar de la debuta d'agost. Aqueste dimenge, las Aglas de Sheffield capitèron pas de contrar lo vam tolosan: 46-24 pels occitans. Una partida bèla s'anóncia per aqueste dissabte 7 de julh a Blanhac, a 6 oras del vèspre: la venguda dels London Broncos . Una novèla victòria raprochariá plan los tolosans de lor objectiu.
 
Los capdèts contra los angleses
 
La formacion francesa dels capdèts (U 16) jogarà doas partidas contra los joves angleses al Barcarés lo dimars 10 e lo divendres 13 de julh.
 


Alan Roch