Los deputats del Parlament Europèu rebutèron dijòus passat la reforma de la lei dels dreches d’autor o copyright, un tèxt fòrça polemic qu’aviá quitament provocat lo barrament temporari de Wikipèdia en protèsta. Los eurodeputats refusèron lo tèxt amb 318 vòtes contra, 278 vòtes en favor e 31 abstencions. La version qu’an rebutada èra estada aprovada a la comission dels afars juridics de l’Eurocambra e cercava d’èsser la proposicion del Parlament per las negociacions que cal dobrir lèu amb los estats membres sus la question. Amb aquel refús, los deputats europèus an un relambi pus larg per analisar cossí reformar la regulacion del copyright: se tracta d’i comprene la proteccion dels autors dels contenguts numerics sens crear de filtres als accèsses sul ret que pòscan far perilhar l’Internet dobèrt.
 
La Comission Europèa prepausava de modernizar la nòrma de l’UE en matèria de dreches d’autor en setembre de 2016, amb la tòca de s’adaptar a las exigéncias de l’encastre numeric. Mas la proposicion generèt longtemps una fòrta division demest los que son favorables al pagament dels dreches d’autor e los qu’avertisson dels risques de limitar l’accès als contenguts en linha.
 
Lo tèxt es mai que mai polemic pels articles 11 e 13. L’article 11 prevei la retribucion dels editors de contenguts publicats suls rets, amb la reconeissença especifica d’un “drech d’autor d’usatge en linha”. S’agís d’un element que la majoritat d’eurodeputats lo soslinha positivament. Mas l’article 13 mençona la possibilitat de crear de filtres amb l’obligacion de “supervisar lo contengut” de las plataformas dels rets socials o de sits similars per evitar que se manque a la proteccion dels dreches d’autor. Es aicí que fòrça deputats europèus e tanben Wikipèdia an mostrat lor inquietud: aquò poiriá d’efièch contravenir a de dreches fondamentals.
 
Dimècres passat, Wikipèdia barrèt son accès coma mesura de protèsta en tot reclamar als èurodeputats que votèsson contra, e mai se los promotors del tèxt defendián que las enciclopèdias en linha coma la de la Wikipèdia demorarián exclusas de las demandas d’observar las nòvas nòrmas de copyright.
 
Los promotors de la reforma anóncian que tornaràn prepausar lo tèma en setembre que ven.