S’acaba uèi a Londres una corsa solidària de 1473 quilomètres dins los passes dels migrants, de Ventemilha a Anglatèrra en passant per Calais. Partida lo 30 d’abril passat de Ventemilha, la Marcha dels Migrants es estada organizada per l’associacion de Calais L’Auberge des Migrants (L’Albèrga dels Migrants), e pel collectiu Ròia Ciutadana.
 
Participavan a la corsa una cinquantena de personas, d’associacions, de collectius, d’ONG, de politicians, d’òmes de Glèisa, de ciutadans e militants solidaris.
 
Los caminaires an rescontrat de mond solidaris pertot ont passavan, que partejavan lors revendicacions: “Daissatz-los passar!” e “Aculhiscam-los!”. Tanben an revendicat la libertat de circulacion e d’establiment dins l’UE. La còla de Ròia Ciutadana a quitament revendicat la dobertura de centres d’aculhença incondicionala e l’abandon del “delicte de solidaritat” pel qual Cédric Herrou es estat qualques còps detengut e jutjat.
 
Lo jornal Reporterre a seguit l’eveniment e ne publica un bèl reportatge.
 

Lo Conselh Constitucional reconeis oficialament lo “principi de fraternitat”
 
Cal pereu remarcar que, de biais inesperat, lo Conselh Constitucional reconeguèt lo 6 de julhet un “principi de fraternitat”: segon l’institucion que garentís lo respècte de la Constitucion francesa, es pas possible d’enseguir las personas qu’ajudan de manièra desinteressada a la demorança irregulara d’estrangièrs. Pròche de l’extrèma drecha, lo deputat de Niça Éric Ciotti (Los Republicans) protestèt contra aquela decision.