Actualitats
Banyuls de la Marenda: un parelh de vinhairons japoneses menaçats d’expulsion
E mai fagan un vin d’excepcion, la prefectura considèra que lor tenement es pas viable. Los vinhairons del país se son mobilizats en lor favor
Shoji Rie e Shoji Hirofumi, qu’an 42 e 38 ans respectivament, arribèron a Banyuls de la Marenda en 2016, crompèron 3,5 ectaras de vinhas e comencèron de far de vin. Mas en abril passat, los Shoji foguèron convidats a quitar l’estat francés per la prefectura: las autoritats estimavan que lo parelh japonés avián pas pro de ressorsas per obténer un títol de sojorn.
Ara, e gràcias a la mobilizacion de la region, lo prefècte ven de lor donar un relambi. Aqueste a decidit “de tornar examinar la situacion administrativa de Rie e Hirofumi Shoji” en lor demandant de comunicar de novèls “elements tecnics e financièrs” sus lor tenement.
La prefectura jutja pas viable lor vinhal, perque lo parelh ganha “mens de 2000 èuros per mes”. Pasmens, cal dire que los Shoji son a jorn de totes lors escotissons e pagaments e qu’an investit 100 000 èuros sus lors fonzes personals e manlevats 50 000 èuros a la banca.
De soslinhar tanben que lor vin, apelat Pedres Blanques, es considerat coma un dels melhors de Catalonha. S’agís d’un roge referenciat en çò de El Celler de Can Roca, un restaurant de Girona elegit en 2016 lo melhor del Mond per la guida Michelin.
“Aqueste vin? Ne poiriam vendre de desenas de milièrs de botelhas. Totun, las vendèm pas pus. Las reservam a nòstres clients del restaurant”, çò afirma a Le Parisien un vinhairon de Banyuls de la Marenda, que tanben participa a las mobilizacions en favor dels Shoji.
Lo movement #Agissons! a donat simbolicament als Shoji la nacionalitat catalana, per lor dire que son benvenguts al país catalan, çò rapòrta Le Journal Catalan.
Les Shoji, citoyens catalans ! https://t.co/HPtThqaF96pic.twitter.com/SmD2DYIfv0
— Le Journal Catalan (@journalcatalan) 5 de juliol de 2018
Suite à la formidable mobilisation, un récépissé de titre de séjour sera accordé par la préfecture à 15 heures aux Shoji, vignerons naturels japonais jusque là menacés d’expulsion ! Victoire!
— Yannick Jadot (@yjadot) 5 de juliol de 2018
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Emai plantèssen pas res, emai produsiguèssen pas res, ni del país, ni d'endacòm mai, son d'èsser vivent dins la biosfèra. De quin dreit tal o tal grop los empachariá de viure en tal o tal lòc de la biosfèra, se que non per egoïsme atavic, primitiu, tant val dire simièsc ? La biosfèra non nos aparten pas. Son nosautres los que li apartenon. E caldriá veire d'o far mai umilament…
Son de monde venguts plantar cavilha au País per s'especializar dinc una activitat tipica dau País sans denegar l'identitat dau País. En mai d'aquò, lur activitat es un avantatge economica per lo País e pièi... pense pas qu'àgon menaçat lo vendeire de lurs vendre sas tèrras...
Fai besonh esclarzir quela situacion ecessiva.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari