Lo bilhet de rand (moneda sud-africana) amb l’efígia de Nelson Mandela intrèt ièr en circulacion en Sud-Africa. Lo nòu bilhet conten un dessenh que representa l’èx-president sud-african e activista antiapartheid sus una fàcia e, sus l’autra, los “cinc grands”: l’elefant, lo leon, lo bufle, lo rinocèros e lo laupard, cinc animals qu’es fòrça malaisit qu’un sol individú los pòsca caçar.
 
Lo bilhet, lançat per la Resèrva Bancària de Sud-Africa (SARB), vòl èsser un omenatge a Mandela per tot çò qu’a capitat long de sa vida. “La Resèrva Bancària es fièra de poder onorar aital una icòna de la lucha de Sud-Africa e lo primièr president elegit democraticament”, çò diguèt lo governador, Gill Marcus.