Enfin, un dialòg politic s’es entamenat entre los govèrns espanhòl e catalan. S’amassèron ièr a Madrid lo president del govèrn espanhòl, Pedro Sánchez, e lo president de la Generalitat de Catalonha, Quim Torra. Eles parlèron durant tres oras dins una reünion que, segon de fonts pròchas del president espanhòl, “aviá trespassat lo lindal d’una reünion protocolària", e èra estada puslèu "una amassada seriosa de trabalh”.
 
 
Reünion “de trabalh eficaç, e plena de cortesiá e de cordialitat”
 
A 16h, la pòrtavotz del govèrn espanhòl, Carmen Calvo, compareissèt davant los mèdias per porgir son bilanç. Calvo diguèt que la reünion foguèt “de trabalh eficaç e plena de cortesiá e de cordialitat”, e soslinhèt que lo grand acòrdi èra la represa de la comission bilaterala entre los dos govèrns, definida dins l’Estatut de Catalonha, que dempuèi l’an 2011 s’èra pas amassada.
 
Pasmens, a la demanda de Quim Torra que Catalonha poguèsse exercir concretament lo drech d’autodeterminacion, Calvo diguèt que “lo president [Sánchez] aviá respondut amb lo fòrça naut autogovèrn, la fòrça nauta descentralizacion del poder, la Constitucion [espanhòla] e l’Estatut [d’autonomia de Catalonha]”.
 
 
“Tota solucion politica passa pel drech d’autodeterminacion”
 
Quant al president de la Generalitat, Quim Torra, expliquèt el meteis son bilanç dins una conferéncia de premsa facha a la delegacion de la Generalitat a Madrid. Torra diguèt qu’el avalorava positivament que Sánchez aguèsse reconegut la necessitat d’una solucion politica al conflicte. Ansin, Torra diguèt a Sánchez que tota solucion politica passava pel drech d’autodeterminacion, una opcion qu’a lo sosten de l’80% del pòble de Catalonha e Aran mas que Sánchez refusa.
 
Torra precisava: “Sánchez a reconegut qu’Espanha es un estat plurinacional, una nacion de nacions, e las nacions an drech a l’autodeterminacion”. E mai lo president catalan diguèt a l’espanhòl que “la sola causa que [demandava] lo catalanisme [èra] lo drech d’autodeterminacion e que [se batèsse pas los catalans] per l’exercir”.
 
Torra definiguèt la reünion coma “longa e sincèra” e afirmèt que los dos caps avián escambiat lors vejaires sus la situacion politica. “Avèm parlat de tot, e aquò es fòrça importnat. Fasiá d’annadas que se podiá pas parlar de tot”, çò assolidèt, en precisar que Sánchez e el avián de “vejaires completament alonhats sul drech d’autodeterminacion”, que pasmens es, segon lo president catalan, “la question fondamentala”. Dins aquel sens, Torra diguèt net e clar que “lo pòble de Catalonha s’èra autodeterminat lo primièr d’octòbre”.
 
 
Es pas Torra mas Puigdemont qu’auriá degut anar a la reünion
 
Dins son bilanç, Torra insistiguèt sul fach lo govèrn de Catalonha renonciava pas a cap de biais d’aténher l’independéncia, en constatar l’existéncia de presonièrs e d’exiliats, çò que lo govèrn espanhòl refusa. Precisament a prepaus dels diferents avises sus la situacion dels exiliats e dels presonièrs politics, Torra demandèt que s’acabèsse “l’ofensiva judiciària e policièra contra l’independentisme”.
 
Torra revendiquèt qu’èra pas el que deviá rescontrar Sánchez mas Carles Puigdemont. “El ganhèt las eleccions e teniá lo sosten de la majoritat absoluda del Parlament de Catalonha. Aquel fach demòstra ja l’anormalitat de la situacion politica de Catalonha”.
 
 
“Aran, un país”
 
Torra portèt de presents a Sánchez, dont una botelha de ratafiat d’un productor conegut per sa lucha contra la linha de fòrça nauta tension que travèrsa los Pirenèus, un libre de mapas istoricas de Catalonha e lo libre Aran, un país. Aqueste es un libre artistic sus la Val d’Aran que conten mai d’un centenat de fotografias de Francesc Tur e de tèxtes de Jèp de Montoya en occitan, catalan e espanhòl.
 
A prepaus d’aquel present, la deputada occitana al Parlament de Catalonha, Anna Geli, se regaudiguèt sus Twitter del temps que remarcava que Catalonha si que reconeis lo drech d’autoderminacion d’Aran. Se demandèt “perqué non Espanha damb Catalonha?”
 

Eth President @QuimTorraiPla à aufrit ath President @sanchezcastejon eth libre 'Aran, un País'. Es aranesi auem reconeishut mercés ath Govèrn de Catalonha eth dret d'autodeterminacion votat per totes es fòrces polítiques e amparat en TC. Per què non Espanha tamb tamb Catalonha?

— Anna Geli (@geli_anna) 9 de juliol de 2018

 
 
La reünion venenta aurà luòc al palais de la Generalitat, a Barcelona. La data es pas encara decidida.
 
Pedro Sánchez publiquèt son avaloracion de la reünion sus Twitter en catalan.
 

Una crisi política requereix una solució política. Aquesta reunió és un punt d'arrencada constructiu per a la normalització de les relacions. pic.twitter.com/l60yTYPjVr

— Pedro Sánchez (@sanchezcastejon) 9 de juliol de 2018

 
 
“Convidarem pas lo rei d’Espanha a cap de ceremònia”
 
Dins sa valoracion, la pòrtavotz del govèrn espanhòl, Carmen Calvo, aviá tanben declarat que s’organizariá de ceremònias en remembre de las victimas dels atemptats terroristas que los visquèron Barcelona e Cambrils los 17 e 18 d’agost passats, e que lo rei d’Espanha, Felip VI, i participariá perque “es lo cap de tot l’estat”.
 
A prepaus d’aquò, Quim Torra assolidèt ça que la dins sa conferéncia de premsa que convidariá pas lo rei espanhòl a cap de ceremònia, e que lo govèrn de la Generalitat participariá pas a cap d’acte ont Felip VI seriá present. “A pas encara demandat perdon”, çò diguèt Torra en referéncia al discors que lo faguèt lo monarca lo 3 de junh passat, que justificava la repression de l’estat contra lo mond que votèron al referendum del 1r d’octòbre.


 

#President@QuimTorraiPla: "Respecte el dret d’autodeterminació, li he recordat els casos de Quebec i Escòcia, els tractats internacionals i la decisió del @CIJ_ICJ sobre Kosovo. Nosaltres fonamentem aquest dret sobre el dret internacional i entenen que és legítim" pic.twitter.com/GtDtWGkwgD

— Govern. Generalitat (@govern) 9 de juliol de 2018

 

El Gobierno afirma tras la reunión de Sánchez y Torra que "hay poco que hablar sobre la autodeterminación" porque "no existe como derecho" pero dice que "hay que hablar de la autonomía de Cataluña y de asuntos enquistados" https://t.co/XaFN55YUV7pic.twitter.com/aQbzm7B1nS

— Europa Press (@europapress) 9 de juliol de 2018