Lo 1r de julhet passat, intrèt en vigor l'abaissament de la limitacion a 80 km/h sus las estradas sens separador central dins tot l'estat francés. Una decision que, tre que s'anoncièt en genièr passat, es contestada pel departament de Cruesa (Lemosin), que refusa de cambiar los panèls de senhalizacion. La presidenta del departament, Valérie Simonet (LR), planh que la reforma “contribuischa a l'enclavament dau departament”.
 
Simonet s'opausa pas a l'installacion dels panèls pels servicis de l'estat, mas son departament i contribuirà pas financièrament. En mai d'aquò, a anonciat qu'installariá una senhalizacion a 90 km/h sus certanas estradas del país. O farà sens èsser dins l'illegalitat, gràcias a una directiva ministeriala que ven d'èsser publicada tot discretament e qu'autoriza lo mantenement de l'anciana velocitat sus las zònas de despassament, çò rapòrta La Montagne.