Cinc personas mòrtas es lo tragic bilanç d'un drama familial que lo patiguèt ièr dimars la vila de Pau. Un òme tuèt sa femna, son enfant de dos ans e sos sògres qu'èran en vesita. Puèi incendièt l'apartament e se suicidèt.
 
Un vesin apelèt los pompièrs a 6h40 del matin, per un incendi dins un apartament del temps que vesiá de sang a rajar jos la pòrta. Quand los pompièrs foguèron arribats, trobèron una scèna esglasianta.
 
Las victimas èran un parelh, lor enfant de 2 ans e los parents de la femna, aquestes originaris de Saragossa. La femna èra tanben sortida d'Aragon e èra professora dins un collègi de Morlans.
 
Segon lo scenari del crime, sembla que lo marit auriá tuat sa femna e los parents d’aquesta abans de metre lo fuòc a l'apartament e de se suicidar. Nada violéncia s'es pas descobèrta sul còrs de l'enfant que poiriá èsser estat intoxicat per las fumadas de l'incendi.
 
S'ignòra quora los faches se passèron exactament. Son d'una extrèma violéncia, compte tengut de l'estat de l'apartament ont an trobat fòrça traças de sang. Mas pareis que los vesins aurián pas res entendut. Solament qualques unes diguèron aver ausit una disputa lo ser abans lo drama. L'enquèsta es entre las mans de la polícia judiciària.
 
La polícia èra ja intervenguda la setmana passada per una garrolha al sen del parelh, segon La Republique des Pyrenées.