L'artista chinesa Liu Xia, veusa del prèmi Nobel de la Patz Liu Xiaobo, es arribada a Berlin. En China se trobava en residéncia susvelhada dempuèi uèch ans, e mai l'acusèsson de pas res. Segon lo govèrn chinés, Liu Xia èra dispausada a morir per protestar, e es anada volontàriament en Alemanha per se sometre a un tractament medical.
 
E mai se cap de procedura judiciària èra dobèrta contra ela, Liu Xia èra amudida e perseguida per la polícia per èsser estat al costat de son paure marit, mòrt fa un an en preson. Dempuèi alavetz s'èran multiplicadas las cridas per que lo govèrn chinés permetèsse a Liu Xia de partir.
 
Liu Xia s'es consagrada a divèrsas arts, sustot la poesia, la pintura e la fotografia. Sas fòtos en negre e blanc son fòrça influenciadas per la calligrafia chinesa, qu'es lo ponch de partença de las arts en aquela cultura, e per ela son l'esplech per defendre la libertat d'expression.
 
Liu Xia a quitat China paucas oras après una reünion a Berlin entre lo primièr ministre chinés, Li Keqiang, e la cancelièra alemanda, Angela Merkel.