Actualitats
L’Estat francés aumentarà la TVA e farà mai de reduccions budgetàrias en 2013
L’an que ven, dins l’Estat francés, s’aumentarà la taxa de valor aponduda (TVA) e se redusirà la despensa publica en 10 miliards d’èuros addicionals. Se redusirà tanben de 20 miliards las cotizacions a las entrepresas dins los 3 ans avenidors per far mai competitiva lor economia.
La reduccion de las cotizacions patronalas suls salaris mai basses servirà a manténer e crear d’emplecs de trabalh en França, çò anoncièt dimars passat lo primièr ministre francés, Jean-Marc Ayrault.
“Aquò representa l’equivalent d’una reduccion del 6% del còst del trabalh. Aquela reduccion de las cotizacions aurà de repercussions dins totes los sectors de l’economia francesa: l’indústria, l’agricultura e los servicis. Ajudarà tanben los grands grops a crear e manténer los emplecs en França”, çò diguèt.
Lo govèrn francés aumentarà la TVA generala de l’actual 19,6% fins al 20%, lo tipe intermediari es lo qu’aumentarà mai: passarà del 7% al 10%. Per contra, la TVA redusida al consume se redusís del 5,5% al 5%.
La pojada de la TVA implica que François Hollande complisca pas son engatjament electoral de non aumentar aquela taxa.
Aquelas mesuras, en general, s’inspiran d’un rapòrt que lo naut foncionari e èx-grand patron Louis Gallois ven de fisar al govèrn. Aquel rapòrt preconiza un “chòc de competitivitat” en favor de l’economia francesa.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
«La reduccion de las cotizacions patronalas suls salaris mai basses servirà a manténer e crear d’emplecs de trabalh en França» >> l'un darrièr l'autre, los govèrns fan pas que de mesuras atal, de petaçatges, que sevisson a manténer los salaris baisses… baisses !
Mai de complexitat, e pas cap de refòrma vertadièra. Cal pas espera de resulta.
Nat comentari...
Los lectors deu jornalet que se'n trufan beròi de la politica economica deu govèrn francés.
Que viven en Occitània, eths !
E saben que seràn totun pertocats com tots los autes Francés, perdon "estatjants de França", per aqueras mesuras ?
E saben que la crisi mondiau e tòca tanben l'endret on viven, de hèit ?
Que vòu miélher anar ciberpelà's suus articles lingüistics, en cas que volossen fóter un accent de truvèrs !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari