L'Arabia Saudita vòl anar mai luènh dins son boicòt de Qatar: d’efièch, prevei de bastir un canal per isolar l'emirat e ne far una illa. Segon qualques mèdias sauditas, lo govèrn de Riad es dispausat a bastir un canal de seissanta quilomètres de longor, vint mètres de prigondor e dos cents de largor, per tal que la peninsula de Qatar venga una illa.
 
Coma s’aquò bastèsse pas, l'Arabia Saudita reservariá un quilomètre d'aquesta nòva illa sus son territòri per i bastir una basa militara e un depaus de curum nuclear.
 
Segon lo jornal Sabq, lo projècte del canal marin serà finançat integralament per cabal privat d'investiment saudita e de sos païses aliats, dont los Emirats Arabis e l'illa de Bahrayn. La collaboracion es tala que contràriament a Qatar, aqueles autres païses serián connectats per una estrada monumentala de 25 mètres de larg e 26 quilomètres de long.
 
Dempuèi qualques decennis, l'Arabia Saudita acusa Qatar de téner de ligams amb Iran e amb de grops terroristas per destabilizar la region. Se capita que Qatar e Iran partejan lo jaç de gas pus grand del Mond.
 
Fa un an, l'Arabia Saudita e sos païses aliats —los Emirats Arabis, Bahrayn, Egipte, Iemèn e Libia— impausèron un boicòt economic e diplomatic contra Qatar. Pasmens, la petita peninsula subreviu al blocatge gràcias a sas relacions amb Oman e Turquia.
 
 
 

---

De legir: Perqué qualques païses an romput lors relacions amb Qatar? (Jornalet 8.6.2017)