La font de la Plaça del Pin a Niça raja pas pus dempuèi un mes. La municipalitat n'a barrat la canèla a causa de la preséncia de personas sens domicili fixe sus la plaça, çò rapòrta Nice-Matin.
 
Lo barrament del grifon se decidiguèt a la fin del mes de mai, pendent una reünion del quartièr Garibaldi amb los comerçants, los abitants e la comuna. La rason qu'invoquèron es que la font atrasiá las personas sens domicili. Segon la presidenta de l'associacion dels comerçants del quartièr, "la vision de sensa-abrics pòt faire demenir la clientèla de certans e, per ansin, alterar la sieua chifra d'afaires".
 
La decision es eficaça per d'unes, e per d'autres inacceptabla, mai que mai se s'agís d'aiga, un ben necessari a la vida e a l'igièna. Per aquela rason, la comuna a anonciat que consultariá los abitants e los comerçants de la Plaça del Pin dins los jorns avenidors.