Los ciutadans de Puerto Rico an votat en referendum sus l’estatut juridic del país, e la majoritat se son prononciats en favor que venga l’estat numèro 51 dels Estats Units. La consulta es pas vinculanta, e serà ara lo congrès estatsunidenc que decidirà s’incorpora Puerto Rico.

Dins una primièra question del referendum, 53,62% an votat non a la question de s’èran d’acòrdi que se mantenguèsse l’actuala condicion territoriala d’estat liure associat. Dins la segonda question del referendum, 62,32% an preferit que Puerto Rico venga un nòu estat dels Estats Units; 32,71% an votat per èsser un estat liure associat sobeiran; del temps que 5,2% dels vòtes son estats per venir un país independent.
 
Dins aqueles comicis, s’elegiá tanben lo nòu president de Puerto Rico, e contràriament al resultat del referendum, los primièrs resultats de l’escrutini dison que lo qu’auriá ganhat las eleccions seriá Alejandro García Padilla, candidat opausant del Partit Popular Democratic e partisan de manténer l’estatut territorial actual.